السلام عليكم ورحمة الله وبركاته
اهديــكم هذه المحــاورة بين الوالـــد:حمد بن مانع ال سالم-وعمي جارالله ابومنصور
قال ابومنصور:
ياعسى الرجال ينجح يوم جانا في اختباره=اختبار صعيب يارجال وان جالك مجالي
شوفنا شين ونشبه بحيات المعاره=كم عقيد قد لوينا فوق كتفه من حبالي
قال ابومحمد:
الليالي دربتني ذايق حلو ومراره=ماعليه دام عارف مكسبي من راس مالي
مانخاف من الحيايا دام حنا اللي نماره=النمر لابغا شيء ترى ماهو يمالي
قال ابومنصور:
كان ابوسلمى شطيروعارف درب الشطاره=يمسك الرسته ولاينكس على خط الرمالي
لفت الرسته خطيرة بين لفات وجواره=الرمال رمال مايمشي بها كون الجمالي
قال ابومحمد:
كل شيء نفهمه والحر مايجهل الاشاره=الرمال اسيرها وايضا خبير بالجبالي
الرجل لابد يعرف ويش عزه من دماره=ينطح الماجوب في وقته ويركي للثقالي
قال ابومنصور:
خايف من بينا تقدح مقابيس الشراره=خلها مستورة واروح غالي وانت غالي
ماحد يبني على بيته وينسى جداره=غير اشوفك طامع في الشمس وتخلي الظلالي
قال ابومحمد:
كان ابومنصور ذا فكرة وعزم باختياره=يثبت اقواله وانا مثبوت بأولاد الحلالي
لاتحسب انك الكبير وكل شيء بيدك قراره=الاخوان اخوان مابينهم رخيص وغالي
وســـلامــــتـــــك
ابونايف الوعيلي