العنا والهم واخلاص المحال
حاربت صمتي تبي بوح الكنين
لي متى والحل يصعب عالسؤال؟
لي متى والاسئله تحمل أنين؟
لي متى والحظ ماشي في ميال؟
لي متى والدمع حاير وسط عين؟
ياعيون الكون لو دمعك هَمَال
ماني بدمعه ولكن عالجبين
يا جفون الشمس ورموش الليال
ويا دموع ايام عمري والسنين
كم ذرفتي في قصيدي من خيال
وكم تركتي داخلي شخص ٍ طعين
كم حروب برايتك كم من قتال
كم اسير ٍ من احاسيسي سجين
ليه دمعك انحدر منّك وسال؟
من جهه تبنين واخرى تهدمين
ما اقول انّي ابي شد الرحال
وما اقول اني تـَحَـت بغيّك رهين
دامني رجّال من نسل الرِجال
لالطمك باللي ماكنتي تخبرين
لاكسر الاغلال واحل الحبال
وافرد الجنحان وهاذي حاجتين
الاوله مبغاك ولو قلتي تعال
وثانياً والله لاشيلك باليدين
ارجعي لمنهم في ترفك والدلال
واحذري العوده ترا تتبهذلين
ارفع براسي الى جالي مجال
ومن سعى لك خاسر ٍ بالاسفلين
بالفؤاد الجمر وبالصدر اشتعال
ولدفا صدري تراك بترجعين
الوعد ماهو مثل قيل ٍ وقال
والوعد انّي لاخلّد كلمتين
لاجعل التاريخ يفخر بي مثال
واسمي الاول مع اللي خالدين
وان رجعت بكلمتي دون المنال
قلّديني خيبتي بما تشهدين
واخذي رقبتي تحت حد السلال
واعرفي ماني على شي ٍ حزين