تبت يدين أهل الدجل والكآبه

[مطلق الشلاحي]

تبت يدين أهل الدجل والكآبه=وتبت يدين اللي لهم حزب تكفير
عن دين ربي والنبي والصحابه=مخالفين الشرع والنهج والسير
ناس لعنهم ربنا في كتابه=ويلعنهم القرآن في كل تفسير
حزب التطرف واضح من خطابه=أهل المشاكل والفتن والمناشير
مايقبلون النقد شلة عصابه=بثوا سموم أفكارهم في مصاغير
ومنهو يخالف نهجهم واعذابه=ليصير كافر عندهم بالتقارير
ماهم بوادم تستحق المهابه=أعداء للانسان والزرع والطير
استغفلونا في غياب الرقابه=وقاموا يحوبون الذهب والدنانير
بأموالنا والجرم صار ارتكابه=ضد البلد والدين نعش ومسامير
حزب وجاله روس فيهم تشابه=ولازم تطاوع فكرهم دون تفكير
وعيالهم للموت محدن صخابه=وعيال خلق الله مدفع وجنزير
وكلن تومر في الشراذم تهابه=وشعارهم نحر الاوادم وتفجير
تشويه للاسلام دين الرحابه=دين العداله والتسامح مع الغير
دين ختم به ربنا واصطفى به=سيد جميع الخلق للناس تنوير
وياشيخ جابر عز منهو انتخابه=دايم ذرانا بالرخا والمعاسير
قلبك كبير وفيه عطف وحبابه=ورايك حكيم ومثلك يشار ويشير
والسيف عزه ينعرف من نصابه=وأمن البلد مايقبل اليوم تبرير
منهو يخرب عجلوا في عقابه=حتى يجي للغير عبره وتحذير
فيهم يجب تطبيق حد الحرابه=والشرع واضح فيه ينقص تعزير
والداب دايم سمه براس نابه=والياوطيت الراس للذيل تدمير
والجرح لامن زاد فيه التهابه=لازم جراحه لو تجي دون تخدير

مطلق بن شلاح