ياقلب تكفى الله الله بغاليك
تراه عندي عن قبيله لحاله
معك خشر فيني وجاك وخشر فيك
إلين صرنا كلبونا حلاله
كوّش علي وياك ياهيك ياهيك
الاوله طيبه والاخرى حياله
والاوله تغني عن الثانيه ذيك
والثانيه لعيون خلي سهاله
يعني شنو لا استعرض شوي تكتيك؟!!
حب يعرف هو صدق واسع خياله!!
ولاّ الغلا ياقلب مافيه تشكيك
احكم عليينا السيطره لا محاله
تبغي الصحيح؟ انه معه (صك تميلك)
هو (إكتتب) حبي وانا راس ماله
والحين ياقلبي تراني موصّيك
في خلي تكفى لا تضيع الجماله
لو غاب عنّك يوم..يومين.. ياتيك
ياتيك واشواقه تسابق ظلاله
لا تقعد تعاتِبه وتقول وش فيك؟
وتذكّره في غيبته وانشغاله
قلّه هلا..مليون.. ارحب.. يالبيك
ياسيد كل الحسن وعمه وخاله
ولا قام يصوّت قل يالبى عراويك
خلّه يحس بقيمته وبجماله
ولا اخطى له بكلمه فلا كنه يعنيك
خلّه يشكّل مابدى من دلاله
وان قال انا مخطي ؟ فضمّه بياديك
وقلّه ابد ماخطيت كلّك عداله
ولا قال احبك قل انا ذايبٍ فيك
وقله وصل حبك لحد الثماله
ناهيك تكدّر خاطر الزين ناهيك
ترى ان زعل يبطي معقّد هلاله
ولامن زعل اكيد ماهو معشيك
والرجل ملزومٍ يعشي عواله
فان طعتني ياقلب ربي محييك
وكانك عصيت انشهد ان بك خباله
محمد بن فهد العرجاني,,,,,,,,,,