من منطلق غيبتك واحساسي وعوقي
والضيقه اللي تضايقنـي واضايقهـا
والعبره اللي يغص بها جفن موقـي
لو جات في محجرك ماهوب طايقها
والبسمه اللي على خبرك من الذوقي
يـادوب الحـق عليهـا واتلاحقهـا
عليك وجه الغرام ووجـه طاروقـي
ماكل كلمـه تقـال انـك تصدقهـا
ترى البشر تنعمي بالحكي وتفوقـي
والروس مـا تنحنـي الا لخالقهـا
شوفه..شحوبي عليك وتل معلوقـي
حقايـق بينـت بـاقـي حقايقـهـا
ولو كل لحظه تعبر عن مدى شوقي
عقارب الساعـه بتزهـق دقايقهـا
على وعد غيمتك لو لاحت بروقـي
مالت غصون قوي الشوق يطرقهـا
والبعد لو طال ضيع جملة حقوقـي
واشعل فتايل غلاك اليـن يحرقهـا
مدام مشلح غـلا ترنيمتـك فوقـي
غرب مطايا صغر سنـك وشرقهـا
الصدر ممطور والزملوق زملوقـي
وزرايره لو شكـت مانيـب بانقهـا
والعب بقلبي عبث ثم بعثر عروقـي
وتلـذذ بهـا وجمعهـا وفرقـهـا
وارتع بلا ضيق والمطرود ملحوقـي
ومتع خطاويك في الاظلاع واطلقهـا
بس اسمع اخر وصات العقل يا ذوقي
كانـك تذوقتـهـا.. والا تذوقـهـا
لاعاد تحداا الهوى والقد ممشوقـي
ثم تنثني قامتـك ويميـل مطرقهـا
ثم تبتلش لك بجرم وذنب مفهوقـي
مسارحه غرتك وعيـون عاشقهـا
اجمل ما في السالفه انك على ذوقي
تطول معـك السوالـف واتذوقهـا
وسلامة نواظركم 
للــشاعـــر // زايــد بـن كـروز العجمي
10-12-2007, 09:51 AM
العرض الشجري
