السلام عليكم ورحمة الله وبركاته
صباح الخير للجميع
قصيده عسي تحوز علي رضاكم
الكون كلّه بأمر من يعلم الغيب=سبحانه الخالق بخلقه تفرّد
وحنّا علي الدنياء زياره وأجانيب=نرحل ولو نملك جبال الزّمرّد
ياما صحبت الليث والنمر والذيب=وياما سمعت الرّاعبيّه تغرّد
وياما زرعت الطيب في ناكر الطيب=لكن حصدّت من اللئيم التّمرّد
وياما صنعت الطيب في أهل المواجيب=وأصبحت في أدناهم أصدّر وأورّد
وياما تجاهلت الخطأ والعذاريب=وأصافح بكفّي كفوف المقرّد
وياما تجرّعت الألم يا الأصاحيب=وللصّدر نفحات الحساني تبرّد
ومن مدرسة الأيّام أخذت التجاريب=ولاني من سلوم الجدود أتجرّد
وان الكرم واجب وأن البخل عيب=وأن الذي مكتوب ماهوب مرّد
وأن الثّقه خير(ن)من الشّك والريب=وأن السكوت أحيان خير(ن)من الرّد
وأن السّواد من الزّمن ينقلب شيب=والشمس لنجوم الليالي تطرّد
وأن الفخر ستر البني الرعابيب=ومسحك لدمعات اليتيم المشرّد
ولا تقرب الفتنه وطف المشاهيب=وأن جيت ديوان المشاكيل ورّد
أهل السنع مثل السيوف المحاديب=وأهل الردي مثل الدجاج المبرّد