محاورة بين شاعر يام علي بن بلال والشاعر تركي الميزاني المطيري

[ابومحمد الشامري]

هذه المحاورة جرت في العام الماضي 2004 في شهر اكوتبر قبل شهر رمضان بين الشاعرين علي بن بلال الفطيحي الوعيلي ( ابو سلطان ) وبين الشاعر تركي الميزاني المطيري الملقب بـ ( تركي 2000 )
تركي:

سلام ردية على اللي قدرهم عندي كبير=أصحابنا اللي من مكارمها تعز أصحابها
والمعرفة من بيننا في الوقت الاول والاخير= واللحية اللي ماتنومس ما تعز أشنابها

علي:

يا مرحبا عن يام في مقدم مطيري من مطير= والملعبة تعرفك يا تركي وأنا بوابها
والعزوه اللي تطحن البارود في ظهر البعير= ما زَعلت رجال يعطي العافية طلابها

تركي:

دام البقا وأنا أدري إنك فيك شر وفيك خير= والخيل من خيالها والنار من شبابها
يا كثر ما يطري على الخاطر وفي وسط الضمير=والمشكله في الغيبه اللي ما نعرف أسبابها

علي:

وأنتم كذلك ما عليكم زود من وقت خطير= ربعك مطير اللي تثني في المناخ اركابها
والوقت هذا تعرفه مثل الرحى اللي تستدير= مالك ومال عيال يام اللي طويل غيابها

تركي:

إركابنا من دونها البارود والسيف الشطير=إليا جلسنا للجمال اللي تعوج ارقابها
وأنت من أول يا علي من خبرة الدنيا خبير= واليوم عينك ما نشوف الا سواد اهدابها

علي:

يا طيبكم ما ذمكم ولكن وينه هو الامير= اللي ما يصبح في بلاد القوم لو أمسابها
يا تركي الـ 2000 لنعود بليس لك خشير= بأعلمك بالحكمة اللي ما تعلمنا بها

تركي:

أثرك يا ابن بلال ما تذكر وتنسى اللي يصير= تبنى خيامك ما دريت ان البلا في أطنابها
قال المثل عيب البعير إليا رغا بعد الهدير= في الديره اللي لا يموت بها ولا يحيا بها

علي:

بكره تبى تصحا وتدري بالكبير من الصغير= إن المعاني دلة صفرا وأنا شرابها
وبعض الاوادم ما يعرفون الجمال من الحمير= هذا بلاي اللي سواتي ما يحسب إحسابها

تركي:

آخر زمانك ما تعرف إيش القليل من الكثير= والدلة أم الهيل يا شرابها صبابها
أهل السفارة قفولها ما بقا فيها سفير= قامت تحاوفها الذياب اللي تحد أنيابها

علي:

العام جاء واحد من البدوان فاقد له بعير= يقول حمران النواظر ضمته لركابها
إفهم قبل ما إترك في ليل عبوس قمطرير= تنظر الى بعض النجوم اللي طوال أذنابها

تركي:

الشك زايل والصقور الكل بجناحه يطير= والكلمة القشرا توقع في طرف من جابها
محد(ن) خبرك تجنب الجنه وتنصا زمهرير= وأنته تعرف النار ما تصير على مشهابها

علي:

أثرك يا تركي غشيم ولا يزعزعك النذير= ما تعلم إن شاعر معاصير الدول غنا بها.

مع تحيات
ابو حمد الشامري