السلام عليكم ..
عرق الضرم علته من صافي الدله=ماهي بخرمة هل الدخان والشيشه
ياريحة الهيل .. راسي علته عله=عجزت الاقي دواه .. وعفت ذالعيشه
ماكني الا مريض ٍ صابته خله=من دونها ,, يفصل العداد عن فيشه
او كني اللي عثر (ثم طاح في شله)=واصبح من اجل المزاج يوازن الريشه
مدمن غلاها .. ولا اطيق الهجر .. لله=وفكري على بعدها يزداد تشويشه
ان شفتها ،, قلت (مرحب..حي ذ الطله)=أعشق شذاها.. عصير وكل تغبيشه
عز الله انها تحلّت بالحلا كله=ماينقص الا (قدوع ٍ من تمر بيشه)
هي سجتي..هي دوا راسي وهي خله=تجلى خوى الراس ثم تعطيه تنعيشه
يازين مجلاسها ،،والكيف في حله=معا وجيه ٍ سفرها فيه تبشيشه
ماتعرف الكركره .. والطيش .. والفله=ولا تعرف الحقد .. والتغميز .. والتيشه
ناس ٍ تعرف الحقوق ..وتدمح الزله=والبن الاشقر .. تقدّر فوح تغشيشه
خوة نشاماً لها في النايفه مله=تحويشة العمر .. لو للعمر تحويشه
ويازين مجلاسها في ساحة الفله=معا وليف الهوى .. لبى خراطيشه
ابو العيون الوسيعه .. والخشم سله=ليا انكشف برقعه .. غنّت دناديشه
اللي على شوفته .. كني على مله=أضرم على جوّه الفتان وآعيشه
هذا قناد الضرم .. لا قرّب الدله=ماهي بجلسة الدخان والشيشه
وسلامتكم
فائق الاحترام ..
ابراهيم آل ربوع