السلام عليكم ورحمة وبركاته
قصيدة للشــاعر / سالم بن رفعان العرجاني
في الشيخ / راكان بن فهد بن قروش آل شامر
بمناسبة تشريفه حفل استقبال خواله ( آل العرجاء ) لقبيلة آل سالم الوعله بمحافظة الخرج
الدانه اللي عليها محكمات القفول=من دونها تقصر الخطوه وشاح الخيال
أحيان لاعز مطلبها عن الفكر أقول=ماعاد خلوا لي الشعار فيها مجال
إلين مريت في رغبه ونشوة ميول=ومن عادة الشاعر الميـّال لامال مال
المهتوي ماترده كلمةٍ من عذول=ومن لاخذاها هوايه ماخذاها احتيال
صدق المشاعر إيلا من جات حزة الوصول=والله ماتنتعوض بالذهب والريال
واليوم طارف عواينها بصدري يجول=إلها على غصن هجسي فالضمير اجتوال
إن هاجرت بالمسامع هاجرت جول جول=من ماكرٍ مايرده غير جزل الجزال
أنا شعاني فعل راكان ذرب الفعول=وبنيت من هجس شعرٍ مايجيب الهزال
أسرجت قادٍ تبوج البيد زينة دلول=تآرد بخيالها لاجاء السبايا جفال
ابيه شيخٍ إليا شدت ثقال الحمول=يعرف جملها إيلا من قيل وين الجمال
وراكان يعرف إيلا جاء للرجاجيل ضول=وحنا خواله إيلا من قيل وين الخوال
من آل مرهم خذا نخوه وطيب وقبول=ومن آل شامر خذا فالطيب سطوة رجال
يشهد بفعله رجاجيل ثقاتٍ عدول=مزبان من شاف من الايام جور وميال
إن كان ضاقت به الأوطان عرضٍ وطول=ماينزل إلا حداكم بالطويل الطوال
أي والله إنه كفو وإنه يقول ويطول=هذا ولدنا ونفخر كان جاء له مجال
وحنا ( آل عرجاء ) إيلا قيل الضعاين فلول=نآرد على الموت ميراد القراح الزلال
يآرد بنا الجمع ميراد يهول العقول=لاطار ستر الهنوف أم الغلا والدلال
يظهر ولدنا ولايظهر رديٍ ختول=ويبين فعله مع الأجناب بين العوال
طاب الهشامي وربعه طيبين زحول=ماخلا ( عجيم ) فالعجمان قاصر حبال
حزامنا اللي فعوله فالشدايد تهول=لاجات بعض المحازم للذخاير ثقال
أقول هرج الصحيح إن قيل وشهو يقول=وهذا مقالي إيلا من قيل ويش المقال
وختامها ذكر خالقنا وذكر الرسول=إعداد وبلٍ تنثر من حقوق الخيال
صح الله لسان الشاعر سالم بن رفعان العرجاني
ويستاهل الشيخ راكان بن فهد بن قروش ال شامر
تح ـياتي