السلام عليكم و رحمة و بركاته
أقدم لكم هذه الرائعة و الجميلة
لـ الشاعر الكبير الغايب عن الساحة
محمد بن خالد النفيعي
عهدي بها قدّام تلبس عبايه =و أنا بعد قبل ألبس شماغ و عقال
طفلين نتهجّى حروف البدايه =الله ياما أجمل سواليف الاطفال
كانت لنا في كل شارع حكايه =و كنّا نقول علوم ماهيب تنقال!
و كنت اتقاسم ما معاها معايه =من (اسكريم) التوت , للعلك ابو ريال
و كانت بعكسي شاطره بـ /القرايه =تقرأ جزء عمّ , و طه , و الأنفال
و أنا لك الله من مواري غبايه =مدري ابو نقطه هو الدال او ذال
و كانت لابويه تشتكي من شقايه=و تعلّمه كيف أربط الباب بحبال
ياما على ظهري كسر من عصايه =يقول لي : خلّك و أنا أبوك رجّال
و أمي تقول : أدع لولدك الهدايه =خوفي تصيبه كثرة الضرب بهبال
لاشفتها مع أوّل الدرب جايه =مدري أنا اللّي ملِْت ولاّ الوطا مال!
أحسّ قلبي يرتجف في حشايه=ما كنّه الاّ الضيف لاهزّ فنجال
ياما عن "السّعلي" تخبّت ورايه =لا خوفوها فيه ثم شافت ظلال
تقول : خلّك يا محمد معايه=و أسّتانس ألعب عندها دور الأبطال
و آغار حتّى من عيون اصدقايه=لا طالعوها قلت : تكفون ياعيال!
و سلامتكم