اوداعت الله يا حزام بن خرصان=اوداعت اللي ما يضيع وديعه
ما عندنا غير الدعا وقت الاحزان=هذا الذي في وسعنا نستطيعه
يغفر لك المعبود خلاق الإنسان=الواحد اللي كل مسلم يطيعه
العبد لو عمر سنينٍ ولو زان=لا بد لوعات الليالي سريعه
وانته يا بن معضد من اللي لهم شان=ولا يفقد الاطيبين الطبيعه
الشيخ مثلك ما يقدر بالاثمان=يا ما عنا لك من صدور وسيعه
لك في صروح الطيب مركز وعنوان=وراع الكرامه والدروب الشجيعه
من روس قومٍ تعطي الكيل مليان=دهات الرجال أهل الحصون المنيعه
الله يثيبك يوم زوغات الأذهان=يوم الحساب وكل نفس مطيعه
نرجو عسالك جنة الخلد مسكان=ومنازلك في جال ربك رفيعه
وختام ما قلنا من القلب ولسان=اوداعت اللي ما يضيع وديعه
سعيد عواد الذيابي العتيبي
جريدة الجزيرة : الثلاثاء 10 ذو الحجة 1431 العدد 13928
مدارات شعبية