يا هاجسي دامك براس نايف ومدهال ذيب
ما يسكن الرجم الخلي إلا..عديم دموي
مطلوب من بعض العرب للموت في بطن الشعيب
و الموت قسمه من نصيب اللي ذراعة يلتوي
ما جبتني عابر.. سبيل ولا تخيلتك غريب
إلا من عظام الظهر عصابة الراس القوي
يوم الله اللي ميزك عن غيرك بطبع عجيب
وصاك ما تسري مع الهبوب و الدرب الضوي
من قال لك لا تارد..البير الموالي للحريب
الرزق ما هو.. منة من ذات إلا من ذوي
وش يمنع الضامي ليا منه وقف فوق الجليب
ما يأخذ بحبل و دلو..ويسوي سوات البدوي
لا صار.. كبده موقده و اطرافها تلهب لهيب
إما يبل عروقها..إلا يموت و ينطوي
قال المثل أسال مجرب قبل لا تسأل الطبيب
صيدأمس خله للثعل لا ينطبخ ولا ينشوي
ولا تلتفت لفتة جريح يدور الرزق القريب
من لا سرى مع الغيوم السارية ما يرتوي
ياللي تهرول هرولة و النوم من عينك سليب
خليت درب المسهلة للي بجلده منزوي
ما كنك إلا يالخوي مذهب و رايح لك ذهيب
كل ما طرت لك كايده تاقف على الضلع تعوي
وإن لدت عيونك على راس الطويلة والصعيب
رحت تعدي كن الصعب يعطيك دافع معنوي
ما تسمع ..إلا همهمة قدامك وخلفك نحيب
واللاش ثوب المرجلة بالسوق والم و شروي
الدرب يوميلك ومن شرواك فاله ما يخيب
ما فات مات وليامتي يا صاحبي أنت جلوي
أنا.. خويك لا بغيت لك من العالم صحيب
أجيك من حيث أنتهى الرجا..و ليا عز الخوي
باسي شديد..ليا رقبت الضلع و براسي قنيب
أما سي رجوم الخطر أعيش عمري فوضوي
ما خفت من طعن الصدور الخوف من طعن كليب
لاجات من يمنى صديق وكيدهن الاأنثوي
إن كثرت الجروح و شفت الشمس آلت للمغيب
أضرب على الكايد عسىتبري الجروح وتنكوي
مادمت أخيل الغيم داني والمح الغصن الرطيب
كلما تهزه ريح أشرلي على ما يحتوي
كنه يقول أبشر..على ما يشتهي جاك النصيب
خذ ما تسير واسترح و الزاد دونك مستوي
دام الجروح المزمنه صيورها لازم تطيب
الصبر..مفتاح الفرج و المجد.. للعقل السوي