العام ما داني مـع الخـط عمّـال...واليـوم للعامـل بقلبـي مــودّه

[ماهمها شي]

من باب دامك فاضي ولابه اشغـال=قالو لـي اشتـر موتـرٍ للمكـدّه
يدخل عليك ريال مع دربـه ريـال=وكل القضيه جيـب راكـب وودّه
وحط الشهاده وسط درجٍ له اقفـال=ولا توسّـد مـن علاهـا المخـدّه
قلت اشترينا ! وابتدينا ! وطوال ..=في شارع الخـزان رحنـا نـودّه
العام ما داني مـع الخـط عمّـال=واليـوم للعامـل بقلبـي مــودّه
في خدمته في ذمتي خوش رجـال=اتناولـه قــدّام يـشّـر بـيـدّه
مواطن وكل الهدف يستـر الحـال=والجوع لقمه من حلالـك تسـدّه
واللي ينافسني على العيش بنقـال=ايحدّني ! وامرار اكافـح واحـدّه
ومن شافني لابس لي شماغ وعقال=جنّب وعني ما يبـا غيـر صـدّه
السر خافي ! في ضميري ولا زال=يجوز احصّـل حـل سـرّي وردّه
طشيت ثوبي ثـم تلبّسـت بنطـال=وومي براسي كل ما خـذت مـدّه
ما اخذت لي في حيلتي عدة ليـال=واليا المصيبه فوق راسـي تكـدّه
قالو سعودي ! مار مجرم ومحتال=واثر الرقم فضّـاح لارحـم جده
لك نيّه ومقصود وعقال مـع فـال=مار اعترف ؟ والهرج بالحق بـدّه
قلت العمامه شر للـرزق واجفـال=واللي لبسها دمعتـه فـوق خـدّه
الاجنبي راسه على روسنـا طـال=وابن الوطن وسط الوطن باح سدّه
عقب الرشاوي مدّها سـر واذلال=اليـوم راعيهـا يمـاري بـمـدّه
من الطبيعي يخطي الرجال لا مـال=ومن المصيبه ما يجي مـن يـردّه
واللي يبا في نقدي إثبـات وادلال=يمشي معي وافرّجـه سيـل جـدّه

للشاعر / زياد الشطيطي .المطيري