من طبعي أرد الإساءة بالإحسان

[ابوالسلاطين العجمي]

من طبعي أرد الإساءة بالإحسان***وأساير اضروف الزمان اللعينة
وأطوف الغلطة من فلان وفلان***يعني من اجل عين تكرم مدينة
الكامل الله والخطأ طبع الإنسان***والدرب يفرق عن يساره يمينه
والصاحب اللي له معزه وله شان***إن جاني بشينه تذكرت زينه
أتحمل أخطاءه معي قدر الإمكان***من جانبي تبقى العلاقة متينة
واللي يغلطني وانأ ماني غلطان***أصابعي أحطها وسط عينة
مادامني(مسلم) وفي قلبي إيمان***عمر البحر ماشال هم السفينة
بعض البشر تحتاج له سر وإعلان***لأقلت له(تكفا)نهض حاجبينه
وبعض البشر ودك تناديه ذيبان***يجي على طاريه لاقلت:وينه
وبعض البشر اسمه من الله اكحيلان***لاطول الغيبات جاب الثمينه
اذا رفيقك مثل (عبدالله وبران)***احذريجون الناس بينك وبينه
ترى الرفيق احيان واحيان واحيان***اقرب لقلب الشخص من والدينه
مرت علي انواع واشكال والوان***بين العقول الناقصة والرزينه
عندي قناعة ان الانسان شيطان***اذا يهينك لازم انك تهينه
يعني اذا حاجتك بيدين عدوان***يكفيك شر المهزلة والغبينة
من كثر ماجاني من الناس خذلان***تحرجني حتى كلمة الله يعينه
صحيح لي ربع وجماعة وخلان***واضيق لكن حاجة الناس شينه
الشخص دام انه بكل شي خسران***تاكد انه من عمايل يدينه
من مرحلة حب ومشاعر وحرمان***ان مالعنت الحب تلعن سنينه
اكتب شعر واعزف من اشواقي الحان***واسلي قلوب الغرام الحزينه
من تجربة(متعب)وغربة(سليمان)***اوجدت نفسي في هدوء وسكينه
الشعر له ناسه على مر الازمان***مثل الامانه باليدين الامينه
والشعر الصادق ترى وين ماكان***يبقا(المفضل)في نظر معجبينه
لو الشعر مخلوق في هيئة إنسان***أقوله:تسلم واقبل جبينه