المشاركة الاولى

[فهيد بن عصيدان]

سلامُ عليكم ,,

أشكر الأخ / بندر بن اخضير على الدعوه الكريمه وهذه المصافحه الاولى .,

وصلتني هذه الدرّه من الشاعر المبدع / طاحوس بن محمّد بن طاحوس ال محفوظ ,,

؛

؛

الا ياهل المرقاب نادوا بـن عصيدان=تقـول القصيدة لازم فهيد يقراني
سلامي على شاعر مغاير فصيح لسان=يغرّد بشعره خارج السّرب وحداني
جزالة وأصالة لاقت اعجاب واستحسان=قويّ المعاني واسع الفكر ملياني
رصين العبارة شاعر محـنّك وبطران=أدوّر قــصيده وأتــلذذهْ لاجاني
قريته وتابعته بحبّ و شـغفْ وادمان=أحـسّ بقصيده مثل دمّي بشرياني
يقولون وش علمك بشخصه بلا نكران .؟=وأنا حدّ علمي فيه (عجمي سليماني)
أعرفه على (محمّد حـمد) ماني بغلطان=وأنا خـابر انّ (فهيد) هو جده الثاني
انا ماني مجامل و لا قــلتها فسقـان=قريت القـصيد ومدري لوين وداني .؟
عجبني قصيده قلت أقدم له البــرهان=وأقـدم تحيـاتي وشكري وعرفاني
سلامي على شاعر مغاير فصيح لسان=يغرد بشعره خـارج السّرب وحداني

؛

؛

طاحوس بن طاحوس


وهاذا ردّي المتواضع ,,

؛

؛

أنا كلّ ماجيت أتعوّذ من الشيطان=عرضلي بليس إمع الهواجيس وأغواني
وشوّشتْ ., وإستلّيت سيف ., وركبت إحصان=وخلّيت سيفي يبرق ., ويصهل إحصاني .!
وقامت هواجيسي تكافخ بلاجنحان=وتغزّلت في بنات الأفكار بلعاني
ولي مدّه إمن أهل القصيد الجزل ضميان=ولكن جذبني بارقٍ ناض وأحياني
سقت غيمته قيفاني ., وسيلت قيفان=وربّع قصيدي وإستهلّيت قيفاني
طربتْ ., وتهيّضتْ ., وبغني وأنا طربان=وأشيّد إبيوت العزّ ., وآكوسر ألحاني
على صوت شاعر من بني عمّي العجمان=برد الصدى له يوم صوّت وناداني
وصلني السلام الذرب والشكر والعرفان=وله أرسل ثناي وزود شكري وعرفاني
عسا الله يقويني بردّ وبيوت إسمان=على شانه أسرف في مديحه على شاني
يقول إنني : (شاعر مغاير فصيح إلسان)=ومدح شعري وسمّى جدودي وسمّاني
هلا مرحبا باللّي لفاني على العنوان=قصيده .، وعجّز قافي وعجّز إلساني
إبيوته تخدمه كنّها هدهد إسليمان=وإهو عندها ماكنّه إلا سليماني .!
ياطاحوس إبن طاحوس ماشا الله الرحمن=على أندر قصيدٍ مبطيٍ منّه وجاني
ببدّيك وإمبدّا على إفلان إبن علاّن=وخلّيت غيرك : رابع ., وثالث ., وثاني
لابالله فيما قلتلي منته إبغلطان=على الشّايب اللي قلته ., وقلت جدّاني
هذا وأنت من ربعٍ لهم فاللّوازم شان=(محافيظ) ريف الضيف ., والجار ., والعاني
وحنّا بني عمٍ على سلسلة جدان=وشيبانك إيعدون من ضمن شيباني
وسلّم ., وأنا ويّاك حسبة ربع وإخوان=وصح الله إلسانك ., وصح الله إلساني .!

؛

؛

فهيد بن محمّد