سمو الأمير/ سلطان بن محمد الكبير أل سعود

[البركان الثائر]

قصيدة في سمو الأمير/ سلطان بن محمد الكبير أل سعود
بمناسبة فوز الحصان(الطويل)

سبحان من سوي من الطين مخلوق=من نطفة(ن) والإنس مخلوق منها
خلق بها دم(ن) ومشاه بعروق=نفخ بها روح(ن) بداخل بدنها
من بعد ذكر الله تري الشعر له ذوق=توارد الأفكار محد(ن) ضمنها
كن الكلام العذب في وسط صندوق=بنات فكري وأتخير لحنها
الشارده عندي لها قيد موثوق=أمقيده والراس في أيدي رسنها
من طب سوق البيع ويراقب السوق=الغاليه معروفة(ن) من ثمنها
وألا مخيله قدمها رعد وإبروق=هلت وسالت وإرتوي القاع منها
وسمية(ن) في عشبها نبت زملوق=عشرين ليل أمطارها من مزنها
تشوف ريضان(ن) تشوق النظر شوق=من شافها يا أمير ما صد عنها
بطرافها تلقي الفقع جنب رقروق=من شامها حتي طوارف يمنها
تكثر مراعيها وترتع بها النوق=يا كن طعم العشب صافي لبنها
والحر منزاله علي راس شاهوق =نادر حرار اللي بعيده وطنها
اللي ليامن تاق للصيد صافوق=فريسته صقارها ما دفنها
ف الكف طبعه زين طلاع ويتوق=دم الحباري في سبوقه دهنها
لأطلق إسبوقه طلعة الشمس ب شروق=يامر علي جول الحباري وينها
لا شاف ربدا عااقها ف السماء عوق=أما إعتلاها فوق وإلاطمنها
لحاق مثل اللي مع اليم زاروق=لو هي عزوم(ن) بالخضيراء مكنها
عدل المناكب صارم الفعل لاحوق=صايد حباريها وصايد عدنها
في كف من للعدل والحق فاروق=شال المراجل كلها وإحتضنها
سلطان أبو نايف ليا سندت فوق=نسل الملوك أتزبن اللي زبنها
حكيم عاقل صادق القول مصدوق=من قبل ما ينطق بكلمه وزنها
عون الذي محكوم مطلوب به سوق=نفسه حزينه كاثرات(ن) شطنها
عينه حربها النوم ما لاق له موق=تهل دمع ولو يقدر سجنها
يغمي عليه أمرار وأمرار ويفوق=الثانيه عنده تعادل زمنها
وإن جات أبو نايف دفع سوق مطبوق=وأعتق بها نفسه وبعد حزنها
سلطان يفعل خير للطيب موفوق=يفعل حساني جعل يجزي حسنها
يستاهل الفنجال ب البن مسيوق=ويستاهل اللي بركت في صحنها
مبروك فوز اللي خذا التاج والطوق=كاس الذي طور قراها ومدنها
فوز(الطويل) اللي علي الخيل سابوق=توّج وقدم الخيل فاز برهنها
هذا وصلي الله علي خير مخلوق=وضح فرايضها ووضح سننها