سألوني الناس عنك يا حبيبي
كتبوا المكاتيب و اخذها الهوا
أنا وين رحت ...؟
<-- أندمج مع الغنيّه
اسألوا محمّد عبده وهو فنان العرب بلا منازع ..
قالوا يا ابونوره .. ( وراك) قمت تخبص لنا ..!؟
ميد ---> (( انشودة المطر )) لبدر شاكر السيّاب
قال بكل ذكاء ودبلوماسيّه : (( هي مرحلة لابد من إنجازها حتى ولو لم يتقبلها الجمهور ))
فلا أشوف ( خشّة ) أحـد يسألني : من وين لك هـ المعلومات ؟
او
( يتكهم ) موضوع ( مُش لائق لمستوى قلمك )
فمازلنا / (( لاشيء ))
والموضوع برمته لرسم الإبتسامه على الشفاه .. <-- أكيد على الشفاه أجل وين ..؟
ولا همني والله تدوين الإبتسامه او الإعتراف بها ( هُنا ، كـ رد )
إلا إذا بتتفاعلون مع الموضوع
وكِل واحد منكم بيسرد لنا ( سالفه او موقف طريف )
ولا أحد يعطينا صواريخ
<== ما كنك أزعجت العالم
اوكي / نبدأ
بعض الحريم ماشاء الله عليها - أرض خصبه -
الظاهر ماراح توقف إنتاج وراعين حتى ولو كانت في الـ 33 من عمرها <--- عمليّة إحباط
وإذا سيّرت على أحد جابت ( درشقها ) معها
وقاموا يتطاقون ( البزارين ) من زود ( العطنه ) وزيادة للخير
على ذكر التسايير .. فيه شيء محيرني ( وفاك مخي )
أوّل الحرمه إذا سيّرت وقالت : بقهوي فلانه ..
تودي معها تمر وألـ ( لقيمات ) وقهوتها في البرّاد
أما ألحين .. أنواع الحلويات والشوكلاته ..
والبعض منهن من زود ( البطره والتمدان ) ..
تودي معها (( إلـ لاب توب )) <-- ماتصبر
هذا مايهم / اللي ( محيرني )
إذا جت ودخلت على الحريم .. وقهوتها معها ..
هل أهل البيت ماعندهم قهوه ..؟
او
لازم يتقهوون من قهوتها ..!!؟ وهي اللي تصب عليهن ..؟
أنزين / عدينا الأولى ...
إذا جت بتروح لبيتها ...
وش تسوي ..؟
خاصة إذا كان قهوتها هي اللي عند الحريم في وقتها ..!؟
- مدري أحس فيه لخبطه وحوسه في الموضوع -
نرجع للحرم والبزران ..
ساره = أم حمودي
نوره = أم فهودي والدووب عبودي
فهود .. ولد مبارك وهادئ .. ولايحرك ساكن
أما
حمّود .. ورع مقلوع ( أقلع من صوافير الليل )
ومسيّر على العالم وجايب كورته معه
وطخ طخ في ذا الجدران
وكسّر اللمبات ولعب في العالم وأزعجهم
والكوره كِل شوي ( طابةٍ ) في ( حوش ) جيران أهل البيت
وتوذت منهم الحاره
حتى (راعي الدُكان ) ما سلم منهم
المهم ذا ( المبزره ) يلعبون كوره في ( الحوش )
قام حمّود و ( فلق ) رأس فهد .. ولد نوره راعيّة البيت
الورع ,, راح للحريم يبكي .. هذا إذا ماقام ( يتبطح ) في ( الحوش )
بعض الحريم وهُنّ النصابات مثل ساره <--- وهُنّ أبوووك يــ الثقااافه <-- وش دخل الثقافه ؟
إذا طق ولدها أحد من الوراعين ..
تروح و( تلقّط ) المطقوق مثل فهودي
وتغسّل وجهه وتمسح على رأسه وتقرأ اللي هي حافظه من القرآن
بعضهن ( تحسب ) التحيّات من القرآن
وتلملمه وتضمه على صدرها .. ( كلبوها حركات تمثيل )
لأنها بين كِل فتره وفتره .. (( تشتم )) ولدها حمّود
وحمّود واقف ----------------->> هنااااااك
ينتظر وش الحكم اللي بيصدر ضده .!؟
لأن الأحكام أنواع
فيها توبيخ وفيها طق وحذف بأقرب شيء توصله اليد
كأني أشوفه يعاين وش اللي بيجيه ..؟
مطبقيّة تمر وإلا ( نعله ) <-- تكرمون
( غادي كِنّه ديك محذوف )
قامت ساره ( عقب الشين ) ولاهي ( بعجله )
والله عانها على ولدها المقلوع وامسكته مع ( علباه ) ، في ( حوش ) البيت
وأسحبته ( ألين ) صار على مرأى من عين نوره و ولدها ( الزلابه )
وقامت ( تدوشن ) ولدها وتطقه على ظهره <-- ولاتعوره بالطق
( حركات تمثيل ) يعني يا فلانه ترى ماني براضيّه
وهي قاطه أذنها تنتظر أحد ( يحلف عليها إن توقف طق )
وإلا كان طقته هناك -----> في الحوش
عاد نوره ( مسيكينه بريئه ) <--- أي طل بريئه
أنطلزت وأمسكت يد ساره وأحلفت ( نذر ) إن ماتطقه - وش هو بعده - ؟
تقول : لاتطقينه وراعين يلعبون مع بعض وكلهم اخوان
( كلبوهن حركات أكشن تمثيل )
ساره .. تضايقت من الجلسه ..
هنا ولدٍ ( زلابه ) يبكي ولا عاد سكت <-- اللي هو فهد
وأمّه معد تقبلت للسوالف .. <-- نوره أم فهد
وكِل شوي ( تنغت ) لها بكلمه تذمر على اللي مسيّره عليها
ضاقت ساره
ولمت غريضاتها وخذت لها ساعه تدوّر وحدةٍ من ( نعولها ) ضايعه <-- تكرمون
ولقطت ( درشقها ) وركبت السيّاره رايحه لبيتها
حتى واحد من ( بزرانها ) همّل كورته و( نعوله ) وراح حافي <-- تكرمون
أنشدوني منها ... توصي إذا لقيتوها احفظوها عندكم
- هُنا بدأ المسلسل
هذيك اللي على بالكم إنها ( قليلّة شر وطيبه )
اللي هي نوره أم الزلابه
أمسكت ولدها و ( مردغته ) هو وأخوه البطه
وقالت : لا عاد تخلون ( العيال ) يطقونكم
تساعدوا وأنت يا الدوب <-- ميد ولدها أبو خدود / اللي هو عبودي
ساعد اخوك وطقوا العيال
وهم ( زلايب ) ماعندهم إلا أبشري يمّه
بأكسر وجهه وأطيره في السماء
وهو مايفكر إلا في ( كودو وجينغل زون )
- بنوقف هنيّا شوي / مع فاصل -
وراح أتطرق لبعض الحريم ( العاقلات ) اللي تسوى لها ديره بأهلها
بعضهن والله ولاتنشد من أحد
منهجها في الحياة (( وراعين يتطاقون وبعد شوي بيلعبون مع بعض ))
- رجعنا بعد الفاصل -
بس مشكلتنا بنقول لكم وبكل أسف
توقفنا .. وإلى ملتقى آآآخـر
\
/
\
أترككم الآن مع معاني بعض المفردات
وقبل كِذا أعتذر شخصياً عن بعض الكلمات الغير لائقه
والله يخلي لنا أمهاتنا ..
ويبارك في الورعان
----
- وراك بمعنى وش قومك ؟ وإلا وش فيك ..؟
- يتكهم مدري وش معناها
- درشق بمعنى عدد لابأس به قد يتجاوز 5
- بزارن ، مبزره ، ورعان ، وراعين ، بمعنى أطفال
- عطنه لايوجد لها تفسير
- البطره والتمدان مثل اللي فوق
- لقيمات طحين مدحرب نآكله في رمضان
- مقلوع يعني جن ملبّس
- أقلع من صوافير الليل .. مثل إغريقي
- الحوش بمعنى فِناء المنزل اللي يتطاردون فيه البزران
- طابةٍ بمعنى خاطره او شاقحه او ناقزه ، أي شيء منها صحيح
- يتبطح بمعنى يتسدح على بطنه وظهره من زود الدلع
- فلَق بمعنى شق حجاجه وأنهمر الدم وقام ينيّط بالصيّاح
- تحسب بمعنى تعتقد وتظن
- عقب بمعنى بعد
- خُشّه بمعنى شفايف
- علباه مؤخرة الرقبه
- راعي الدكّان هو الباكستاني مُحيي الدين
- زلابه بمعنى رايح فيها
- أبوخدود سِر خواله
- ألين بمعنى إلى
- تنغت اسلوب في النطق تطلّع حرف وتآكل حرفين
- كودو وجنغل زون مايحتاج تعرفونها كلكم
- مردغه بمعنى دوشنه
- ( غادي كِّنه ديك محذوف ) ، اعذروني والله إني عاجز أفسّر وأكتب
- دوشنه بمعنى مردغه
- تلقّط بمعنى تخُم وتجمع
*********
* تم إستخدام اللهجة الدارجه عمداً
* جميع الأسماء مستعاره و ( كِل الحكايّه ) خيال
* ممنوع الزعـل
* مدري مكانووو مزبوووط هنيّاااا ؟
* دوّن قبل هذا اليوم بأربع أيااام
ولابغينا نقضي
يللاااا
تشاااوو
03-11-2007, 08:10 AM
العرض المتطور
المواضيع المتشابهه
