السلام عليكم ورحمه الله وبركاته
البارحه ناصر يقول اشتر الطير = يومن كلن ناقل معه طير
خلنا نقزر باقي العمر تقزير = ونصبح ونمسي كل يومن بديره
نركب على اللي مايحسب المشاوير = كان الدروب طوال تصبح قصيره
جيبن جديد ولاشخفته المعاصير = توه ولافكو براغي سبيره
ومعنا اشقرن مانقلوه السماسير = بين المزاد وبين غيره وغيره
اليا تنهض ثم طلع كنه الزير = ومخالبه مثل السيوف الشطيره
لاعرضتله في السما ماهي بخير = حرام بالله ماتحول كسيره
واقوله ذا الساع ابعطيك تقرير = وبعلمك بعلومنا والسريره
الطير دبله كبد فوق المخاسير = ولافيه لاخير ولافيه خيره
وراعيه دايم يالرجال المناعير = في حاله يرثى لها سب طيره
وراعي الصقر مايعرف الا الصقاقير = لاشك والله ما عليهم قصيره
والمشكله يا اخيك لاروح الطير = وتباشروا اهل الوجيه الشريره
فلان راعي الطير الاشقر الجير = هده على ذيك الحبارى الصغيره
واقفا وهملها وانا اشوف يا امير = والكل منهم قام يعطي بشيره
وتصير علك بحلق كل الصقاقير = وتروح لاصيده ولامن ستيره
يا اخيك خل الطير ومعابل الطير = انتف جناح الطير واللعن مشيره
وابرى لذودن كل ابيها مغاتير = لامن طاح الوسم في كل ديره
تلقى الخزامى والنفل والنواوير = في وسط روضن عشبته بعثريره
وبنيت بيتن مدهلن للمسايير = من لابتك ولا زحول الجزيره
وشبيت ضوك ثم جبت المباهير = والهرش عند الصبح تسمع هديره
يا ماحلى دراج ذيك المصاغير = في خايعن راعي الغنم مايسيره
اليا ندبهن جن من غير تأخير = والاوله ماهي سوات الأخيره
لاصوت الراعي تشوش الاباكير = وعلى يمين الكور ترثع فطيره
ومن بينهن شقحاً تقود المعاشير = لاشافها الشايب تلخبط مسيره
في وصفها تحتار كل التفاكير = في وصفها فتنه وعجبه وغيره
هذي طراة العمر ياراعي الطير = اطلق صراح الطير واقطع جريره
وسلامتكم