--}{ العنود والزمن الاغبر / مصافحة اولــى }{--

[بدر بن تركي]

السلام عليكم ورحمة الله وبركاته

يسعدني بل ويشرفني التحاقي معكم على هذا الركب الشامخ بكم

والذي يزهو ويفخر بأحد القبائل العريقه

كما اتمنى ان اقدم ما يرضي ذائقتكم العذبة

مصاافحة اولى

انا ودي اعبر عن شعوري بس لاتبكون=انا ادريبه قلوب لا طروا الها الحزن بكاها
انا لي قصةٍ فيها غرايب عالم مجنون=تحير من قراها في نهايتها ومبداها
اببدا بس من وين ابتدي ياقلبي المغبون=ابكتب بس منهو يفهم الشكوى ومعناها
ثمان سنين اداري جرحي اللي داخلي مدفون=واسج الرجل في دروب الليال وضاعت خطاها
اسولف للعرب واضحك وعن بلواي ما يدرون=لساني ما نطق ساكت وعـيني حافظٍ ماها
حلفت اني مابين للبشر عن جرحي المكنون=ثمان سنين نفسي ماشكت للناس بلواها
اصبر قلبي اللي من غرابيل الزمن محزون=وادله نفسي اللي ضاقت بها كل دنياها
سنين كلها هم ونكد واحزان شكل ولون=تقلبني على نار الوجع في وقت احياها
اشوف الوقت ماهو مثل وقت مر لي يطرون=اقوله بعد ما ميزت فيه الناس وش جاها
تخالطبه مذاهب واسعه في سوقها يشرون=سلوم ما عرفناها دروب ما مشاناها
زمان غير طبوع الخلايق واصبحت في دون=تغير خلقها حتى المبادي قام يمحاها‍
والا يا فكرتي في هالزمن يا من خلقت الكون=تغير في الخلايق ما تغير وانت مولاها
كتمت هموم قلبي ثم صاح القلب للمزيون=بعد ما مر من عمري ثلاث سنين عشناها
قبل مابديه للي صرت له في حسبة المسجون=ملكني بالغلا واصبح اعز الناس واغلاها
عواله صدري من الهم يبغا منه شور وعون=بعد ما شبت ضلوعه بنار الهم ناداها
يبا صافي حنانه يطفي النار بغلا مجنون=قبل ما تصبح ضلوعي رماد دواي من فاها
قبل ما تسمع الشكوى وتفهم صادق المضمون=طغى التفكير واعماها وصاردواي من داها
وانا اللي كنت احسب ان الصراحه واجب لها نصون=واثر باب الصراحه عيب ناصل له ونقراها
ذبحتي باقي العمر اللي بقلب الغلا مرهون=حرام الروح في بعدك وقربك تاصل اقصاها
على وضح النقى جيتك على وضح النقى بالهون=ترفق لاتصير اللي كحل عينيه واعماها
ترى بعض الخطا يابنت عنه الناس ما يرضون=ولو ضحيت لجلك عزتي من حقي احماها
من الوقت افطني حتى لو اني ما هرجت بلون=خصيم النفس هو اللي بنفسه يعدل اخطاها
حرمني من حنانه يوم بحر الشك جا من دون=بدر ليل ضواها وللرضا والعز نساها
ريم ينبش جروحي وانا ماقول غير تمون=تمون تمون يفداها العمر والروح تفداها
ريم عقبها كل البني للعين ما يملون=كما نور القمر لا شع نوره في محياها
جمع زين ودلع مع ملح وصفه ما كسى مزيون=سواها جل خالقها بكل الحسن سواها
عسى الله يحفظه من كل مكروه وحسد وعيون=ولو الوقت فرقنا مسامح واطلب رضاها
بقت شكواي في صدري وسدي دايم مصيون=ابصبر والصبر مبداي وأنهى النفس واعصاها
وابا وجه يديني للي افنى بقوته فرعون=وابطلب منه غفرانه لنفس فيه رجواها
وابدعي امنو ياللي لصوت المبتلي توحون=الا يالله لا تشقي قلوب تطلب مناها
وتغفرلي ذنوبي بامرك ليا قلت كون يكون=وكل هموم قلبي يا عليم السر تجلاها
ولامن عودت للجد نسل من ظهر دندون=محنكني على الطيب وعلى الصدق وورثناهـا
علوم كلها نفخر بها مافيه علم الهون=سلوم جدودنا لابد نحفظها ونرعاها
وانا اقول اللي معافا مهب مثل اللذي مطعون=ولا يونس لهيب النار غار اللي توطاها
وهذي قصتي يوم استدار القاف جات لحون=تشيب رمش من يسمع نهايتها ومبداها

وسلامت قلوبكم

اخوكم
بدر بن تركي العتيبي ( وضح النقى )

[" مــــابه جديــــد "]

ارحب ياتركي
مرحبابك بين خوانك وهاذي الساعه المباركه

وصح لسانك على ذالرايعه ولاهنت

فمان الله

[العـــسر]

الله الله

صح لسانك يالعتيبي


ولاهنت على هذا النص



مبدع .... فإنتظار جديدك



تقبل مروري

[سعود الجوفان]

بدر بن تركي

حياك الله في مجالس قبيلة العجمان

صح لسانك على ذالقصيده الجزله

بإنتظارك

تحيتي

[الخليفه]

صح الله لسانك يابوتركي

قصيدة جزله من راس جزل

بارك الله فيك ووفقك الله

[بدر بن تركي]

الاخ العزيز مابه جديد

ابقااك الله يالقرم

صح بدنك ولا هنت على حضورك وترحيبك السخي

شرفني تواجدك طال عمرك

الف شكر لك

ولا عدمتك

لك
تحياتي الخالدة،،،

[بدر بن تركي]

الاخ العزيز العسر

حياك الله يالقرم

صح بدنك ولا انت يا بعدي

شرفني تواجدك وطراءك العذب

الف شكر لك

ولا عدمتك

لك
تحياتي الخالدة،،،

[بدر بن تركي]

الاخ العزيز سعود الجوفان

ابقاك الله يالقرم

صح بدنك ولا هنت على حضورك الكريم

شرفني تواجدك وطراءك العذب

الف شكر لك

ولا عدمتك

لك
تحياتي الخالدة،،،

[بدر بن تركي]

الاخ العزيز الخليفه

حياك الله يالقرم

صح بدنك ولا هنت على حضورك الكريم

شرفني تواجدك وطراءك العذب

الف شكر لك

ولا عدمتك

لك
تحياتي الخالدة،،،

[الشاخوف]

صح الله لساااااااااانك واعتلا شانك والمولى عانك

تقبل مروري ومتابعتي

الشاخووف