قصيدة
"سبعة وعشرين" من كلمات وأداء الشاعر المرحوم:
سعيد بن واحش الغامدي رحمه الله
للحفظ اضغط هنا
نص القصيدة:
عام الف واربعمية سبعة وعشريـن=وشهر المحرم داير(ن) في مداره
الثلث باقي له .. وقد راح ثلثين=يا ايام عمري .. ياسنيني ..مجارة
ذالحين وين .. ووين انا قبل عامين=عز الله ماخابت صلاة استخارة
قمنا نزاحم بالركب .. والذراعيين=من سوق الاسهم .. لين سوق التجارة
نخطي بوحدة .. ثم وحدة ..وثنتين=والخامسة تنشب بصدر الحبارة
مع اننا مابين بايع .. وشارين=والسوق مشغلني بكثر الفرارة
لكن على المبدى .. من اول وذلحين!!=الدرب باقي ماتغير مساره
الفقر .. ماعلمني شحذ الغنيين=والمال .. مانساني وقت الطفارة
افرح بضيفي .. واحتمي للقصيرين=وافزع لربعي يوم قدح الشرارة
كفّي يجملني ولو كان بالدين=اشوى .. ولا يكتب عليّه قصارة
من يوم أنا ورع(ن) مابين الوراعين=وآبي يلقمني علوم الظفارة
واليوم عمري طاف سبعة وعشرين=يحرم عليّة حتى شرب الزقارة
لكنها يابو عجب ماهي باللين=يبغالها صبر وجهاد وشطارة
ان لم تكن ذيبا(ن).. بياكلك ذيبين!!=هذا تمام الهرج .. هذا قرارة
لو ماسكتنا عن خطايا القريبين=ماشفت لي عند البعيدين غارة
واقرب مثل .. يابوعجب وينك الحين=قصّرت عني .. بالوصل والزيارة
ضرب العلابي .. بعد صرم الكراعين=خليتني بعد اليسر .. فالعسارة
عالكامري الاكس إل تسعة وتسعين=طالع من الدمام .. وابغى مطاره
من يوم ماعديت "واحد وسبعين"=والعين هلت دمعها بالغزارة
الله عليهم متلفين المحبين=اللي شراهم راح عمره خسارة
وقفتها في موقف البي سفنتين=على يمين الباب .. مدري يساره
وقمت اندرج بين الغرف والصوالين=احث سيري بين شارة وشارة
فيدي التذاكر ..والشنط ..والعناوين=وفي عيني العبرة وقلبي الحرارة
ثم قامت "الجنبو" ترف الجناحين=واخذت علينا دورة واستدارة
والليل غنى للسحب ليل ياعين=والسحب غنت ياحلو ياسمارة
كل(ن) يغني للنفل والرياحين=وانا ملد(ن) طرفي من الغمارة
هذي بقايا البحْر..ذي سكة الرين=منّا طريق بقيق .. هذا سواره
كني مودع مابجي بعد يومين=معمور يالدمام باهله وجاره
الين حلت ديرة(ن) حيها عين=للحب فيها لوحة(ن) واستمارة
جدة عساها للسخا والسخيين=رغم الزمان وضيقته وانقصاره
كم لي بها "غمّد" وكم لي "زهارين"=درقي نهار الرمي ينثر غباره
لافي لبيت اللي له الناس لافين=ماقد لفاه احد(ن) وخيّب مزاره
اليا طِلب يعطي عطايا الكريمين=حتى الملوك تجيه بيته وداره
منّا ومنّا ..كلهم مستغيثين=ماضاق ملكه .. من صغاره كباره
دامه كريم ..وكل يدينه يمين=باهب على جابة دعاي البشارة
سبحانه الخالق وحنّا المساكين=وأنا في بيته ..عز ملكه وجاره
امشي مابين اهل الساعين المطيفين=محرم .. وطرفي ما يوقف عباره
يالله يا رب العباد المصلين=في وجهي الكعبة وظهري المنارة
بين الركيع .. الساجدين ..الملبين=قدّام نور الصبح .. يبدي شعاره
فرج لمن ضاقت عليه الأراضين=في عينه الدنيا ماتسوى كسارة
سبحانك اللهم ..امين ..امين=يامن يجيب بقدرته واقتدارة
تقبلوا تحياتي؛؛؛؛؛؛؛؛؛؛؛؛؛؛
07-12-2007, 03:12 PM
العرض الشجري
المواضيع المتشابهه
