لاياعديل الروح من وين ألمك...وردن تبعثر داخلي ماجنيتك ..

[محمد المجول]

منيت نفس العاشق بريح كمك=وأبطيت ماجيت الحنايا فديتك.
أحلفك بالخالق اللي أتمك=ليتك تجي وتشوف مسكنك ليتك.
لاياعديل الروح من وين ألمك=وردن تبعثر داخلي ماجنيتك.
يسرح بي الهاجس على نور رسمك=والقاف يطرب لاغدى البيت بيتك.
كنك معي وأيام عمري تضمك=كني...ولاأدري ...سقت روحي وجيتك.
أنا معك برضاك ضحكك وهمك=شريتني حب ووفا وإشتريتك.
على كفوف الشوق بزيح غمك=وأقدم أيمان الفرح لا رأيتك.
الموت ماهو موت قوسك وسهمك=الموت لامن صرت حي وبكيتك.
فرحة حياتي وأسعد العمر يمك=لاياجعلني للعدم لو نسيتك.
ياساكنن فيني بكيفك وكمك=لبنه على لبنه في قلبي بنيتك.
تعال شوف القلب وشلون ضمك=حي(ن)إيلا جيته وإيلا رحت ميتك.

[هداج تيماء]

قصيدة رائعة صح لسانك يا الشاعر المبدع محمد المجول

[محمد المجول]

هداج تيماء

صح الله بدنك طال عمرك

والله لايهينك على مرورك الكريم

اللي زادني شرف

تقبل تحياتي

الموت لامـن صـرت حـي وبكيتـك

لله درك يابوعبيد

ابوعبيد انت تعرف ردي دايم وشهو . لاتهقا اني مااقرا قصايدك . لاوالله الا متابع لك دايم ..

ومهب معناه اني ماارديت خلاص .

لكن تأكد اني معجب جدا بشاعريتك الفذه

الموت لامـن صـرت حـي وبكيتـك << بري حالي

صح الله لساانك ولاهنت ياغالي

[ابومحمد الشامري]

قصيدة رائعه وصح لسانك يا محمد ولا تبطي بجديدك يا السنافي

[عبدالرحمن الجبابرة]

الشاعر القدير : محمد المجول
صح لسانك وسلم فكرك
قصيدة رائعة
بيض الله وجهك ولاعدمناك
.
.
مودتي

[محمد المجول]

محمد بن دسمه

مايحتاج توضح الله يطول عمرك

داري وعارف اللي بالقلب جعلك تسلم

ويكفيني مرورك الكريم اللي زادني شرف

لاهنت طال عمرك

وافي جعلك تحيا

[الملكة]

أحلفـك بالخـالـق الـلـي أتـمـك=ليتك تجي وتشـوف مسكنـك ليتـك.
لاياعديل الـروح مـن ويـن ألمـك=وردن تبعثـر داخـلـي ماجنيـتـك.

ابيات عذبة.. صح لسانك يا محمد.. ولا تحرمنا جديدك..

[محمد المجول]

أبو حمد الشامري

صح الله بدنك طال عمرك

والله لايهينك على مرورك الكريم

اللي زادني شرف

تقبل تحياتي

[محمد المجول]

عبد الرحمن الجبابره

صح الله بدنك طال عمرك

والله لايهينك على مرورك

اللي زادني شرف

تقبل تحياتي