كشتتنا ذيك السنه ,,,

[ملكعه بس غير]

السلاااام علييييييكم ورررررحمة الله وبركاااااااااااااااااته << متحمسه بزياده :D
البارحه ماغفت عيني ولا ساعه .... تدرون ليه ؟؟؟؟ << يمكن مافيش نوم .. يازيني اسأل واجاوب من نفسي ماقلت لكم متحمسه :D
البارحه تالي الليل يوم اقول لكم مانمت وسألتكم تدرون ليه وجاوبتو غلط << ياليل مااطولك
علشان بنت خالتي اتصلت علي وقعدنا نتذكر يوم كشتنا ذيك السنه "" قريب مهوب بعيد"
بس كانت كشته غير << على وزن ملكعه بس غير
المووهم اني مانمت والسبب اني حسيت ان صدري تفكك من الضحك انا وياها على ذيك الرحله العجيبه
وبما اني احب لغيري مااحب لنفسي قلت اسردها عليكم وشوفو ليه كانت هالرحله غير


ملاحظه : القصه طويله اذا وراك شغل ولامالك خلق لاتقراها
******************************************
هذا ياطويلين العمووووومر والسلاااااااامه عيد من الاعياد اتفقنا حنا وخوالي نطلع للبر عند حلال خالي وخالي ذا مايداني نجيه يقول البزران يعاقبون الحلال ويوكلونهم قراطيس << مدلع نياقه :D
بس ماله فكه مننا وراه وراه لويروح ورى الحدود << ياشين اللزقه
عاد اقول لكم جا اليوم الموعود اللي بنمشي فيه كان في ليلو العيد عقب الساعه 12 ومقر الاجتماع بيتنا علشان البيق بوس عندنا ""الشايب بالعربي "
عاد انا وخواتي يوم حسبنا متى بنوصل للبر الا هو بيوم العيد قلنا بنكشخ من اللحين ويوم بدت الوفود بالوصول وشافونا بنات خالاتي كاشخات وعلمناهم بالحسبه انهبلن الا يكشخن ويروحون يبون ينزلون الشناط وصارت طلايب علشان ينزلونها كانو الرياجيل معيين مثلكم عارف التعب اللي يجي مع ربط العفش
مالكم بالطويله كشخنا ومشينا ويوم وصلنا للقليب جا وقت صلاة العيد وصلينا هناك ويوم خلصنا جينا نمشي ويخرب الوانيت اللي شايل الخيام كلها قعدو الرياجيل يحايلون فيه واما الحريم والبني والمبزره افترشو الارض ويالجه مابعدها لجه وطبعا ماننسى الهنديات لان عددهم كان لايستهان فيه << ماانسى نظرات اهل الديره لامرو بسياراتهم
بالاخير قالو بتمشي باقي السيارات والوانيت راعيه بيطرش للنعيريه لانوو مافيه ميكانيكي بالقليب
مشينا وخلينا الخيام ورانا ولاوصلنا لخالي الا المغرب وذلك بسسبب الضيعه اللي ضعناها بالبر والسبب الثاني ان خالي حاول يبعد قدر المستطاع علشان مانجيه بس مافيه فايده لاحقينه لاحقينه :D
ولاكان معنا من الخيام الا خيمة المطبخ بنوها بيضان الوجيه وخلوها للعجايز والحريم الكبار ينامون فيها اما بقية الشعب متحاشرين بالسيارات وكان برررررررررررررررررررد موووووووت وتخيلو الاشكال اغلبنا نام وهو قاعد عاد اللي نايم وحاط رجل على رجل وواللي راسه يلوح واللي متسفط على نفسه من البرد
الوكاد صحينا على الزراق ولقينا وحده من السيارات مضببه ماتشوف اللي داخلها قلنا اكيد ماتو اللي فيها يوم نجيهم الا هم بخير بس هذا من الدفا اللي داخل السياره :D
وصل الوانيت وبنينا الخيام وقعدنا نسوي رحلات استكشافيه حول الموقع وكان الموقع ولااحلى منه يعني ماشاءالله تطلع من خيمتك بتروح للمطبخ ماتوصل الا معك فقعتين ثلاث
وبدينا تصوير ويابلفيت حركات نمسك الفقعه ونحطها عند الخد << ابووك ياللقطه :D
والفقعه تمر على كل وحده بتصور نفس اللقطه والرموش مشهبه من الغبره والايدين من حفر الفقع حتى العجايز كانو متحمسات لاجينا نصور وحده فيهن فرعت<< ياهي ثقه
ويجي يوم ولا الابل توها جايه ونطلع حنا يالبنات والحريم والبزوره نتفرج ويروحن البنيات اللي بالطعشات يابلفيت بيوكلون وحده منهم و انا كنت توني قريب من باب الخيمه وكنت اربط خيوط الجوتي الله يعزكم والله وانا مدنقه الا احس صواريخ تمر من يميني ويساري شفتو وانت تمشي بخط واحد رايح جاي وشلون السيارات تمر من جنبك << امش يالوصف اللي كذا :D
يوم ارفع عيني ولا وحده من النياق انفلتت عليهن وطردي وراهم هم مووو حوولي بس الوكاد اني بنحاش اخاف يلفون علي ولاشي عاد انا لفيت وعيني على الناقه من بعيد ولااشوف دربي ماخذيت الا يوم شالني ربي وطحت على وجهي يوم التفت بشوف وش اللي طرحني الا هي بنت خالتي ام ست سنين كانت طايحه قبلي وانا طحت فيها << الخوف يعمي وهذا الدليل :D
واقوم وتكسر خاطري واشلها بس شفتها وقفت وانحاش داخل الخيمه باقي بنتين اللي تلحقهن الناقه كان اقرب شي لهم خيمه الرياجيل ولاتسمعون الصيااح بالمخيم كله طلعو خوالي اثنين وابوي وجدي وكان عندهم ضيوف رجالين يعرفونهم << يافشلتنا منهم ووجيههم كذا
والبنات متوجهات لهم ويجي خالي ويصيح على الناقه ويحذفها ويلوح بشماغه وتروح عنهم ويجي معصب يبي يهاوش بس يوم شاف وجيه البنات وشلون متصفقه وغاصتهن العبره ماقال شي
واجتمعنا بالخيمه كل وحده تتحمد الثانيه على سلامتها الااختي تقول والله ماتصدقون يابنات انا كنت عند الابل مع البنات ويوم شفت الناقه تركض حطيت رجلي ولاعاد التفت ومسسسسرررعه ولااستوعبت الا وانا متعديه العرب والخيام ولاحولي احد ههههههههههههههههههه :D
وجا الليل قلنا يالله بنلعب كوورة :soccer: كنا ماشاءالله حول 23 بنت اصغرنا ام سنتين واكبرنا ام 22
ويكتب الله واصير انا الحارس والله وكيلكم ماغير قاعده انا وبنت خالي دفاع نسولف ماجاتنا ولاكوره ماغير يتداحنن بالنص وعجتهن ثايره وتبلشني بنت خالتي عمرها 4 سنين الا تشيليني واشلها وواقفه فيها وتجيني الكوره واخذها واقول للبزر اللي متعلق برقبتي تمسكي حانت اللحظه الحاسمه واهجم بالكوره << الحارس وليد اللي مع الكابتن ماجد على غفله ههههههههههههههههههههههه :D
والله واهجم بنت ابوي ولاردني الا يوم سجلت قووووول << مومن شطارتش باللعب الا من ردى اللي يلعبون هههههههههههههههههههههه :D
يوم اصبحنا ولا امي وخالاتي وجداتي رايحين يتمشون ويتفقعون وبنات سيلان يغسلن وينشرن
وانا وبنت خالتي اخر من صحى وجينا نبي نفطر مافيه شي بسم الله عليكم وش اقول بس عساكم ماتصيرون خبز وجبن بهالمخيم
قلت انا وبنت خالتي خلينا نسوي ريوق << يابلفيت جيدات
قالت بنت خالتي خلينا نشب الضو ونسوي الشاهي عليها احلى قلت شورش وهداية الله
والله ونشب ذيك الضو ونحذف الحطب اللي حاطبينه الصبح فيها الين تعدت الخيمه وكان قايله وحرررر وحنا شابين ضو ومقابلينها يوم وصلن جداتي ويشخلوونا شخال
احد يشب ضوو الضحىىىى الحطب هذا حاطبينه لليييييل وانتن حذفتنه كله ابكيييييكن يالرفلات يالـ************** كلام مشفر ماله داعي
قالو مثل ماخربتو الحطب روووحن احطبن واروح انا وخويتي ندوج ونحطب وتشققت ايدينا ولاتسوى علينا هالريوق اللي ماتريقناه
جا العصر ويجيبون الشباب دبابات
وياسلااامي عالدبابات :D
وهواش كل وحده تبي تركب قبل الثانيه وطوابير وناس تستعرض وناس يالله تمشي وناس ركبت فيه وانحاشت علشان محد ياخذ الدباب عقبها الا خالتي قصتها قصه مع الدباب ركبت هي وولدها عمره 7 سنين ونعلمها هذا اللي يمشي وهذا اللي يوقف وتتوكل بنت ابوها بس ماعرفت تلف وتمشي قداااااااااااااام ونست وين اللي يوقف الدباب وقداااااااااااااااااام قدااااااااااااااااااااااااام ونصيح عليها وووقفي ستووووووووووووب خلاااااااااااص mg: بس ماااااااااااش ولاردها ياطويلين العمر الا خيمة الخدامات بس جت سليمه من غير اصابات :D
وكنا جايبين طيران وطبول ولاجا الليل نجتمع بخيمه كبيره ونلعب عرس :D طبعا ماشاءالله حنا واجد كنا نقسم نخلي كم وحده يابلفيت فرقة الطقاقات وكم وحده يعني اهل العرس والباقي ضيوف والخدامات اذا فاضيات نجيبهم معنا :D
وودي اكمل بس ادرري اني طووولت عليييكم بالحييييل



:lightbulb عاد انتو وش تستفيدون من هالسالفه تابعو التالي :lightbulb

1_ لاتربطون قشكم فوق السيارات الا عقب ماتتأكدون ان اهلكم ماعاد يبون شي
2_ لاتحطون الخيام كلها في سياره وحده ولا بيجيكم ماجانا :sad:
3_ لااحد يسوي حركات هو مو قدها ويسوي نفسه شجاع وهو من جنبها
4_ اذا كنت حارس مرمى لاتتهور وتسوي مثلي ومثل الكابتن وليد ترى مو اي احد يسويها << خيرر
5_ جعلك ماتصير لقمه لااجتمعنا حنا وخوالي ياهو يصير شفااح تقول جايين من مجاعه :D
6_ لاتشبون ضو الضحى ترى حر << محد سواها غيركم يافالحه :D
7_ لاتخلون الدبابات مع اهلكم من غير سوبرفايزر
8_ لاتسوون طقطه واغاني بالبر ترى الجنون سيرو علينا عقب ماسوينا عرس يقولون ليه ماعزمتونا ولاعاد غنينا :zip:
9_ اتحدى احد فيكم يقول مكرر << للحين في قلبها يوم هزأتوني عالموضوع القديم :D
10_ لو ان امي مانادتني ولا كان ماخلصت نصح لبكره بس الله فككم :D

[النـايف]

ههههههههههههههههه لا المرّه هذي ماهو بمكرر وليت امك ماجات من غير شر عشان تطول السالفه

لا هنتي يا ملكعه بس غير .. لا لا قصدي الحارس وليد على ذي السالفه اللي تضحك وربي .. وأضحك الله سنك ..

النايف

[محمد الشامري]

هههههههههههههههههههههههههههه

لله درش يا ملكعه

بدويات يابلفيت ههههههههههههههههههههه

لاهنتي على ذكر ذا السالفة الزينه

وسلمتي

[بدر العرجاني]

أرب خالش شد من مكانه اللي هو فيه

لأنكم لزقاااااااات صدق

ههههههه

[صدى الشوق]

والله الكشته الزينه
يا زين الكشته في البرحه ههههههههههه

لاهنتي الملكعه وفي انتظار كشتتكم الثانيه في الربيع القدام واحذروا من الفقع لما قدكم تحفرون عليه ههههههه

[الوافـي]

ههههههههههههههههههههه
اشهد انها مهيب مكرره ذا القصه
لاهنتي يا ملكعه و في انتظار رحلتكم الثانيه في الربيع الجاي عسى الله يجيب الحيا والفقع

[ضيدان بن مترك]

	[[ تستفيدون من هالسالفه تابعو التالي ]] 1_ لاتربطون قشكم فوق السيارات الا عقب ماتتأكدون ان اهلكم ماعاد يبون شي .. 2_ لاتحطون الخيام كلها في سياره وحده ولا بيجيكم ماجانا .. 3_ لااحد يسوي حركات هو مو قدها ويسوي نفسه شجاع وهو من جنبها 4_ اذا كنت حارس مرمى لاتتهور وتسوي مثلي ومثل الكابتن وليد ترى مو اي احد يسويها .! 5_ جعلك ماتصير لقمه لااجتمعنا حنا وخوالي ياهو يصير شفااح تقول جايين من مجاعه .! 6_ لاتشبون ضو الضحى ترى حر محد سواها غيركم يافالحه . 7_ لاتخلون الدبابات مع اهلكم من غير سوبرفايزر . 8_ لاتسوون طقطه واغاني بالبر ترى الجنون سيرو علينا عقب ماسوينا عرس يقولون ليه ماعزمتونا ولاعاد غنينا . ؟؟؟؟؟؟ بصراحه.سالفه تشد القارئ.وذربه وحلوه وأخذنا المفيد الله يوفقك تاملكعه والوعد العيد عند الخال الله يجمعكم علي خير وبصحه جيده.في انتظار سالفه أحلاء بنفس ألأسلوب الله يعطينا والجميع العمر و الله يرعاكم امين.............

[ملكعه بس غير]

هلااا بك النايف ومرحبا
واضحك الله سنك انت << تحسبها مسبه :D

[ملكعه بس غير]

ياامرحبا بالعجاري والمشاعيب كووولهم ,,,
قصدي هلا بالشامري يالله حيه :D
وعسى الضحكه دوم

[ملكعه بس غير]

بدر خالي اللحين لانشدوه الرياجيل وين محلك بنسير عليك يسأل اول من اللي بيجي اذا الرياجيل بروحهم علمهم اما اذا حنا معهم سد الخط يابلفيت مافيه سيرفس :D