قصيده في عطايا الله

[ابن الحايف]

يا زين شوف الأبل على جلهة البير = وبيوت اهلها في القطين الموالي
مقياضها في الجوب والا الجوافير = ما قيضت بطراف حمى شمالي
أن صدرت كنها تشادي طوابير = سودآ مجاهيمآ كبارآ غوالي
خزنآ لهلها في ليالي معاسير = مثل الغروس السود مال وجمالي
وحوارها يذبح الى جو مسايير = عادات اهلها من قديمآ وتالي
وانشى من القبله قنوفآ مزابير = يكشف سنى برقه سواد الليالي
ذكر الحيا جاهم من الله بتيسير = وتنوعت الأنوع على كل بالي
احدآ تعجل خف سير المظاهير = اقفت مظاهيره نوى بالمحالي
واحدآ تريض صار عنده مصاغير = يمشي على كيفه ولا هو يمالي
واللي تريض جوه ربعآ مداوير = وقالوا له الريضان كنها زوالي
بطرافها شفنا الزبيدي مفاطير = ومتنوعآ عشب السهل والجبالي
والصبح طووا البيوت الغنادير = والمال يسرح ما بقى له توالي
وهروجهم ما بينهم في الأباكير = يغليك من نومك حسيك الجمالي
يا زين منداها باوقات المصافير = في مشبرآ من دوس الأغنام خالي
نصف الدبش قدهوا يقانف معاشير = تسمع زجير فحولها في المفالي
تقطف نواوير الزهر في المحايير = ما رددوها من سنعها العيالي
هذي طراة البدو دايم على السير = في شف بال مزرجات الحبالي
من دونها ما حسبوا للمخاسير = وكم واحدآ من دونها ما يبالي
ويازين بطراف الدبش هدة الطير = على الحباري وابرق الريش شالي
اسمر يجي بطراف ريشه مغاتير = مثل الشجاع اللي يفك التوالي
متنقيينه من طيورآ مشاهير = شبرين طوله زايدآ به قفالي
الى انتحى للجو ما عاد بيطير = تلقاه مثل مكببات الملالي

[أبو مسعود]

صح لسااااااااانك مليون يابن حايف


لاهنت

[سعود بن تركي ( العديم )]

ابن الحايف

صح لسانك ملييوون ولايكفون


اخــوك العديم

[زهرة الخزامى]

صح لسانك ولسان ابن الحايف راعي القصيد ونرجوا منك ان تتحفنا بأكثر من هذا في أنتظار جديد ابن الحايف لانه غني عن التعريف
تحياتي لكم جميعا

[سعود الخويطري]

الله الله



صح الله لسانك يـ بن حايف ولاهنت



قصيدة رائعه وننتظر المزيد



تقبل سلامي واشواقي

الخويطري

[فهد بن محسن]

صح لسان يابن الحايف


لاهنت على ذا القصيده الجزله

تحياتي لك

[حبيب]

وحوارها يذبح الى جـو مساييـر
عادات اهلها مـن قديمـآ وتالـي

كفووووووووووووووووووو يايام

صح الساانك يابن الحايف ولاهنت

قصيدة جزله من شاعر جزل

[ابن الحايف]

لا هنتوا جميع وتسلمون على الرد الطيب