الخوف من حومات عوج المناقير=لاطالت ايدين الأسود الذيابه

[مسعطر]

السلام عليكم و رحمة الله وبركاته ,,



بإختصار : شِعر قضعاني

لله في خلقه شؤون و تدابير=او ما قدّر المولى على العبد صابه
و الدين فقه و شرح سِنة و تفسير=و الهدي هدي المصطفى و الصحابة
و الحُكم لله ثم الـ /حُكّامنا الغير=عن كل حكام ٍ إتقيم الحرابة
حُكّامنا اللّي تسبق الشرّ بـ /الخير=أهل الورع و الدين شرعه و ادابه
اعوال (ابو تركي) اكعام الطوابير=خادم بيوت الله و حافظ اكتابه
(أخوان نورة) مبِعدين التفاكير=عز لنا نموت له و انحيا به
اليا طروا لي هِمْت (ابانات) و (النير)=و زادت رحابة الأرض عندي رحابة
و عدّيت ما عدّوا الرجال المناعير=ظلع ٍ ارجومه تختلف و اتشابه
عدّوه قبلي منهم آعز و آخير=منّي و لو مانيب مذهوب لابة
مرقب قصيد ٍ ينبدا ضحيّ و اعصير=(راكان) ذبّه و (السديري) بدا به
يا كثر من ذبّه من (اسبيع) و (امطير)=و (اهذيل) و (ادنى يام) و (أقصى شبابه)
ادناه جال و ما تعلاّ شناضير=و اوسط مذبّه مثل قوس الربابة
الله كتب عدّايتي له و انا ادير=من شُرّد الأفكار ما يندعى به
هواجس ٍ يلطم بها الموج و يحير=و ينفض بها النوّ المحدّر ربابه
لو تنتفرّق فرّقتها الأعاصير=اللّي تفرّق كل ربع و قرابه
لكن تجمّع مثل ورِد ٍ على بير=و تمطر سحايبها سحابه سحابه
على فياض ٍ ما اكتست بـ / النواوير=الا قبل يرحل كبير المهابة
اتلى ربيع ٍ ربّعوه (المناصير)=و رعْوه صيف امن (الحسا) لـ (اللهابة)
و العام هذا .. عند وال التدابير=علمه و مرباعه و لذّة شرابه
إن بارك الله فـ / القنوف المزابير=جاو البدو كلّن يسابق اركابه
و الحضر مثل البدو تتلى المظاهير=و ما شفت في هذا الزمن لا غرابة
متى متى بنزل امن الظلع و اسير.؟=ما دام قرص الشمس هايف إغيابه
او ما قلت فـ / المشراف ما غير تعبير=شِعر ٍ حفظته ما كتبته اكتابه
و اللّيل من مبداه للثلث الآخير=ما لاق مِن نومه نهبته انهابه
عليّ من شعري اقيود و محاذير=حتى المثايل صار فيها طِلابة
يا راكب اللّي مالها شدّ و اسبير=او في كل جوّ ٍ ما عليها رقابة
سوّاقها ما عاش كروة مشاوير=ولا حطّ في خرجينها من زهابه
مسيرها فـ /القاع لحظات و تطير=و تِهِوي كما حر ٍ هوا له إعقابه
امن (السعوديّة) اتسنّد لـ /(آقادير)=و تنزل ابـ /سِيف ٍ وا هني من مشا به
و اليا نزل حدّر الـ (تونس) بـ / تقرير=عن حالة اللي كل همّ ٍ لجا به
يلِفي مكان اللّي عشق هدة الطير=ليث ٍ يعشق المرجلة من شبابه
يلقى إخيام ٍ بين سربة مغاوير=يركد إليا جاهم و ياخذ إحسابه
و ينشد إليا أقبل عن خيام الصقاقير.؟=و يضيفهم ما كن حيّ ٍ درا به
و اليا دروا عنْه الشيوخ المشاهير=دعوه فـ /البيت الشّعَر : يا هلا به
في مجلس ٍ ما ضيّعوه المداوير=يحِذَف على ناره من اطراف غابه
في حظنها كنّ الدلال المصاطير=جميلة ٍ ترعى الدبق في ضبابه
و اليا تريـّح مثل باقي المسايير=و طار العماس و زال عنْه إكتئابه
و قالوا : المسيّر جعلها له مسافير=هاتوا اعلومه و إنشدوا ويش جابه.؟
وقّف على حيلك و فكّ الأزارير=و كلّن اتثمن وقفته من جوابه
و سلّم سلام ٍ مثل درّ المصاغير=و ألذ من شَقُر الخلايا مذابه
و قل : يا (حفيد الفهد) هيف المخاسير=يا ذُخر من حلو الكرى ما اهتنى به
يقول (ابن قضعان ضيدان) ما غير=ما غير (تركي) فزعة ٍ ينهقى به
يا امير خانت بي اظروف و مقادير=و غطّى على سواد وقتي شهابه
الوقت قاسي و اللّيالي مدابير=و جرحي عطيب ولا يفيد الدوا به
اونس ابكبدي مثل دقّ المسامير=و اصبر بها و ازيد عزم و صلابه
و الخوف من حومات عوج المناقير=لا طالت إيدين الأسود الذيابة
غارت علي الأقدار من حيث لا اغير=و الظن بعض أحيان لا وا سفى به
ما دامني ما اخطيت ليه المعاذير=ولا اذنبت لي ذنب ٍ يجوز إحتسابه
و إن كاني خاين افـ / كب الأشاوير=و راسي الـ / سيفك يوم يفخت إجرابه
و الحق شذرات السيوف البواتير=اليا ألتوى الخاين و كشّر ابـ / نابه
يا امير مابه ذنب يحتاج تكفير=ولا خطاً يحمل و ناخذ إعقابه
تكفى يا (تركي) فوق كل المعايير=شي ٍ تحملته ولا أحد ٍ رضى به
يا ريف ربعك فـ / الليالي المعاسير=يوم إن ولد اللاش رزقه هبابه
انا خويّك طيحتي طيحة ابعير=تكثر سكاكين البدو في ذهابه
و أكبر امن اللّي صار وش عاد بيصير.!=عشان أكب الشعر و آصك بابه
و انا و لو ما اسطّر الشعر تسطير=في مدح (تركي) و أشتقي و أعنا به
عليه حدتني اعيون الجماهير=تقول : (تركي) ليه طول إغيابه .؟
تكفى يا (تركي) جدّك أشجع من الزير=سيف ٍ اتعدّي سلّته عن نصابه
يامير تكفى فزعة (الفهد) يا امير=فزعة (فهد) في ماقف ٍ ينحكى به

و سلااااامتك


-- دمتم بحفظ الرحمن --



حرصاً منّي على دقة و سهولة قراءة القصيدة : عمدت إلى كتابة القصيدة بلفظها النبطي من دون الإلتزام بقواعد الإملاء العربيّة
لأن الإلتزام بها قد يؤدي إلى تحريف اللفظ خاصة ٍ لمن لا يتقن الشِعر النبطي و لم يتمرّس به ,,

[جـراح]

قصيدة بن قضعان واللي جايبها مسعطر

وشلون ما تجي فاخره ومميزه


صح السان بن قضعان وصح كلك يا مسعطر


وتسلم يالسنافي

[" مــــابه جديــــد "]

هاذا ماجنته على نفسها جهينا

لااهنت يالشيخ لااهنت
ماياتي منك الا الزين

سلاام

[مسعطر]

و زادها فخر مرورك يا جراح
و صح بدنك طال عمرك ,, و مرررحبا بك و مسهلاااا ,,

[مسعطر]

[QUOTE=" مــــابه جديــــد ";857350]هاذا ماجنته على نفسها جهينا

لااهنت يالشيخ لااهنت
ماياتي منك الا الزين

سلاام[/QUOTE][FONT="Simplified Arabic"]خافك تبي براقش بدل جهينا
و لاندمت ,, و لاندمت ,, و شكراً على تواجدك مررحبا و مسهلااا ,,[/FONT]

[" مــــابه جديــــد "]

هياها اهم شي وصلت المعولمها

[عبوره دوت كوم]

يسلموو على القصيد القضعاني

[حـــوران]

علـيّ مـن شعـري اقيـود و محاذيـر=حتـى المثايـل صـار فيهـا طِـلابـة

اي بالله فيها طلابه , لا وفيها فصل وتعهدات وفيها تكفى ياتركي قايم قاعد

راحت في الشحم ذالمره


لاهنت يامسعطر على النقل

[مسعطر]

المشاركة الأصلية كتبت بواسطة " مــــابه جديــــد "

هياها اهم شي وصلت المعولمها

اهم شي وصلت المعولمها
و مرحبا و مسهلااا يالشيخ

[مسعطر]

المشاركة الأصلية كتبت بواسطة عبوره دوت كوم

يسلموو على القصيد القضعاني

العفووو و مرحبااا بك و مسهلاااا