دست المطامن

[عبدالله ال مجحود]

بين الهموم وبين دار ٍ غريبه
دست المطامن وارتفع فوقها اجبال

في ذي السماوة دافع ٍ لي ضريبه
ضريبة ٍ ماهي على عملة ريال

اشوف بعض الناس بوّر صحيبه
والبعض واقف له على وقفت ارجال

ماكل شخص ٍ بالمراجل تجيبه
لو كان ساسه ما هو بخلفت انذال

لا شك ان اطباعه تردت عطيبه
ماكلن يوّفي على القول لا قال

اللي مثل ذا لا حشى ويش ابي به
ياخيبة العشره ويا خيبة الفال

احدن في حاله صامت وقد دري به
واحدن في نفسه ضارب ٍ ذيك الامثال

والناس ماتدري دواه وطبيبه
والناس تنغر بالمظاهر والاقوال

قليلهم يفطن ظنونه نجيبه
ولا انطرب معهم على جر موال

وبعضهم طربان جهل ٍ وخيبه
تطربهم الشيلة على قلت افعال

عزي لمنهو ما خلص من لهيبه
جاهد على حمله تصبّر بالاثقال

عزيز نفسه وعزته ما تسيبه
والنار ماتخمد وباقي لها اشعال

يضحك ويسولف ما يقمّن لهيبه
وان قالها يفعل ووقفاته اجزال

واحيان فعله سابق ٍ ما يحكي به
وكلن فعوله بالمجالس بتنقال

ويظل في شخصه حضور ٍ وهيبه
فزو له الشيبان قدام العيال

هذا اذا حوله اوادم لبيبه
ماهيب تجحد قالوا فلان رجال

الله يجيره في سواته يثيبه
وسيرته تشهد على مر الاجيال

الله يقرب كل حي لقريبه
ويحقق لمنهو طموحاته آمال

كل ٍ في عمره ماخذن من نصيبه
وسبحانه الواحد عليم ٍ بالآجال



وسلامتكم





عبدالله ابن بندر ال مجحود

[king الوادي king]

ونعم ياعبدالله وصح لسانك

والله لايهينك على القصيده الجزله وجعلك تسلم على كل حال

وننتظر جديدك يابو بندر

[عبدالله ال مجحود]

والنعم حالك .. صح الله بدنك واسعدني كونك اول القارئين

وافرحني ردك ومرورك

[فـــــ fawaz ـواز]

صح لسااانك


وعساااك على القوهـ


ربي يعااافيك


لاهنت يالغالي

[M!Ss LeGeNd]

صح لسانك أخي الكريم

"دائمـا مميــز فيمــا تكتــب"


لاتحرمنا جديدكـ
وفقك الله

[عبدالله ال مجحود]

المشاركة الأصلية كتبت بواسطة فـــــ fawaz ـواز

صح لسااانك


وعساااك على القوهـ


ربي يعااافيك


لاهنت يالغالي

صح بدنك ومرحبا بك .. شرفت ونورت

[عبدالله ال مجحود]

المشاركة الأصلية كتبت بواسطة M!Ss LeGeNd

صح لسانك أخي الكريم

"دائمـا مميــز فيمــا تكتــب"


لاتحرمنا جديدكـ
وفقك الله

سلمك الله .. صح بدنك ولاهنتي

يعطيك العافية