يا بوي.. قصيدتين لفيحان القعياني ولخليل بن هدلان وبأداء فايز العوني (شيلتين صوتية)

[عبدالله آل عامر]

بسم الله الرحمن الرحيم
:
أسعد الله أوقاتكم بكل خير
:
أثناء تصفحي في الشبكة العنكبوتية وجدت قصيدتين مختلفتين من حيث المضمون ولو تشابه الموضوع
:
فالأولى مرثية والثانية مدح والقصيدتين لشاعرين لهما وزنهم في الساحة الشعبية وأداها اثنتاهم الشاعر المبدع: فايز العوني
:
الشاعر الكبير: فيحان القعياني يرثي والده
:

يا بوي ضاقت دنيتي بعد فرقـاك=كنّي بهالدنيا وحيدٍ لحالـي
قالوا مريض وقالوا الهـم يبـراك=قلت آه ما تدرون يا بـري حالـي
يفز قلبـي كـل ما حـل طريـاك=وأصفق على الكف اليمين الشمالي
لا تحسب إنّا بعـد موتـك نسينـاك=لا والذي ينشي صدوق الخيالـي
أنت الوحيد اللي حقيقـة فقدنـاك=والقلب ما هو عنك دالـه وسالـي
وأكبر مصيبة يوم للقبـر جبنـاك=عليك ملفوفات بيـض الشيالـي
وحطوك في الحفرة ولا عاد شفنـاك=وهلوا عليك ترابها وأنـت غالـي
ما لي جدا غير أمسح الدمع وأنعـاك=الله يصبرنـي علـى ما جرى لـي
الله يغفر لـك ويمحـي خطايـاك=وفي جنة الفردوس منزلك عالـي
مرحوم ياللي تفعل الخير يمنـاك=يابن صويلح يا كريـم السبالـي
الطيب والنوماس والدين يزهـاك=عز الله إنك من زحول الرجالـي
ما عاد باقي عندنا غيـر ذكـراك=حتى وأنا في النوم أشوفـك قبالـي

:

:

:
:
وهذي قصيدة الشاعر: خليل بن هدلان في مدح والده
:

البارحة يا بوي كثرت طواريـك=كنّك على ماضي سنينك تعـدا
من قو باسك ما تبيّن شكاويك=جبار ما بيّح لك الوقـت سـدا
لو تنهدا الأعمار والله لأهديك=زهوة شبابي في مشيبـك تفـدا
الله يطول في حياتـك ويبقيـك=وتاتي لك أيامك على ما تـودا
وإنه من صدوف الليالي يعديـك=ياللي بطيبك نفتخـر وانتقـدا
أكبر سعادة يوم أبرّك وأبدّيـك=وعلي نفسك قبل نفسـي تبـدا
وأكبر سعادة يا يبه يـوم ألبّيـك=لبيه من قلـبٍ لصوتـك يـودا
وأكبر سعادة يوم أقبّل أياديـك=في نشوة منها الرضـا مستمـدا
وأكبر سعادة يا يبه يوم أخاويـك=للمـدن وإلا خايـعٍ مجرهـدا
وأسمع علومك وأتسلى وأسليك=وينزاح هـمٍّ في الحشـا مستبـدا
وأكبر سعادة يوم أصافي مصافيك=وأقدّر اللي لـك رفيـقٍ مـودا
وأعني وأزور اللي يزورك وياتيك=وأجنّب اللي عنك جنّب وصدا
وأضدّ عدوانك وأعادي معاديك=وآقف على درب العدوّ وأتحـدا
لك اعتبرني طـوّل الله لياليـك=عبدٍ مليك في لزومـك يسـدا

:

:

:
تقبلوا فائق ودي واحترامي
:

[ابن سحيم]

يعطيك الف الف عافية يا ابو سراج على المقطع الرئع
::
وهذي من طبايعك الطيب
::
ابيض وجه يا ابو سراج

[الغروب]

عبدالله ال عامر

اشكرك على امتناعنا بهذه القصائد المميزة والرائعة

وصح لسان من قالها .

[EmpeRoR]

لاهنت يابوعابد على الشيلتين الروووعه والحزينة.
تقبل مروري.

[ِِِAL 3ajmiah]

بيض الله وجهك ولا هنت ..

جزاك الله خير ~

[جرح الفراق]

يا بوي ضاقت دنيتي بعـد فرقـاك && كنّـي بهالدنيـا وحيـدٍ لحـالـي
قالوا مريض وقالوا الهـم يبـراك && قلت آه ما تدرون يا بـري حالـي
&&

الله يرحم ابوي ويرحم جميع اموات المسلمين قولو امييين

ربي يعطيك العافيه اخوي عبدالله تسلم يمينك على النقل

تقبل مروري

[عبدالله آل عامر]

ربي يعافيكم جميع ولاندمتوا يالغالين
:
تسلمون على تشريفكم وردودكم
:

[هادي بن فهاد]

تسلم يمينك

يعطيك عافية يا ابو سراج على المقطع الرئع

[عبدالله آل عامر]

الله يسلمك ويعافيك يابو فهاد
:

[( ابومحمدالشامري )]

الله لايهينك يابوعامر