بسم الله الرحمن الرحيم
هذي بعض القصايد عن الجمس حبيت كل من يحب الجمس ان يقراها لأني أنا عن نفسي مولع بالجمس ولا أشوف ان في له منافس في البر غير الجمس ولا تلومون العاشق ترا العاشق أعمى والموضوع موجه للعضو المرزوقي راعي السفاري اللي صجنا ورجنا بمدحه لموتره وتطعيسه بالسفاري والسموحه من الجميع.
ضيدان بن قضعان في قصيدته الجزلة عن الجمس :
راكب الي ماتجيبه بالبيد=ولايجيبه بهبهاني ولا وضيحي قطر
ادهم وسم الجميح على جنبه جديد=مهبل الي يوم عرض يحسبنه شفر
جمس شكمانين ملقبينه با الوليد=من سرابه ما يغبط القصيبي والجبر
كاتبين في ضمانه حديده ما يبيد=تمرة قاري عليها حفيد ابوبكر
كن وجهه لانطحته تشعشع يوم عيد=وانقفيته كنه السيل لاسال وحد
وان عرضلك في مزاياه من عنق الفريد=وان ركبته تحسب انك على سطح القمر
دقته نغمة عبادي على سلم فريد=لا عزف الاول وجاوب عاشر وتر
لاشتغل قالت شكامينه اركد يا حديد= والقزوز تقول للقاع روح يا فقر
كن شكمانه الايمن صدا عبد المجيد=وكن شكمانه الايسر صدا نايف صقر
والبلوف تقول للكهربه هل من مزيد=والسيور تقول للمروحه اين المفر
كل اغانيهم على درب واصل يا عنيد=لين تلفي قصر شيخ العليا شهر
سايقه من صلب ربعي وله باس شديد=ما يخاف البعد والليل والموت الحمر
من صناديد ال عرجا هل العلم الوكيد=لابة من جن تمشي على هيئة بشر
وقصيدة لفارس بن مقبل العصيمي
واركب على جمس ٍ يشوقك بممشـاه= كنك علـى قطـع المسافـات ناخيـه
ليا وقف شيخ ٍ علـى جـال مركـاه= كـل ٍ يبـي قربـه وخدمـة معاليـه
وليا مشـى عقيـد قـوم ٍ سرايـاه =تنفـذ إيعـازه وترجـي حسانـيـه
اللـون صخـري كامـلات ٍ مزايـاه =أربع ميـة شوفـك يحقـه ويخطيـه
كنك على طـوي البسيطـة تحـدّاه= يخسر جميع اللـي بمشيـه يماريـه
عبدالله بن عبار يصف الجمس ويقول :
ياراكب اللى عارف (ن)مبلغه بيش=عزاه للمفلس يمره على ماش
مايشتريه اللى امورة تناويش =متعند راعيه يبغى الثمن كاش
مازاودوبه بالحراج المغاشيش=ولا دخل التصليح فى وسط الاوراش
جديد ما تلقى ببديه نقاريش=تو البواخر حولتبه من الطاش
جمس حمر مايستوى للدراويش=يجوز لغلام(ن)نصوب وبناش
بطران مايدرى على الجمس حتيش=لو كان قدامه بطانيج واحراش
كنه غريق(ن)شافق(ن)لقطت القيش=والا سكير(ن)شارب(ن) خمسة اغراش
ولا تقول مهرب بالطلب حيش =حمله حشيش وراكبه تقل حشاش
حدوه من لبنان حمر الطرابيش=واقفى معيف بتالى العمر منحاش
اربع مفارز بين جندى وشاويش=والكل منهم قام يصلاه رشاش
اقفى معيف ولا تفيد البخاشيش=يب تنصى اخوات صيته بالاوباش
يهوى مع البيدا كما ناقض الريش=او مثل جول(ن) للثميلات عطاش
ويلمع كما لمع المزون المراهيش=اومثل عبرود(ن) تولاه نتاش
ويسرى كما التيار لاركب الفيش= او مثل لمحات المصور بالافلاش
سعد بن سلطان الرخيمي يصف إعجابه بالجمس :
ياراكب من عندنا جمس(ن) اسـرد =
اليا دعست اسليتـره تقـل يطـرد =
كنـه مهـرب والمهـرب مـهـدد =
حمل على الماخوذ حشيش(ن) اسود=
و عليـه قـوات السواحـل تشـدد =
عطوه فيها حول خمسـة عشـر رد =
كبس لبنصه واحتمى العلـم واشتـد =
و يوم استواله نابي الحزم الاجـرد =
ويـــوم ارهـــوا انـــه راح مـاعــاد يـنــرد=
وعطوا خبر لمسـدد الرمـي سـدد =
وقام أيتصرم .. ماصه الموت الجلد=
يصلاه بالرشـاش قـرم(ن) مسـدد =
وقام يتعزوى يوم صـارت معانـد =
و صكه بثالث وانتهض فوق وإرتـد =
ولا لحم البنزينـه بثالـث وصـرد =
و رقوه إلى تسعين كيلو ورا الحـد =
فوقه شجاع امـورد الخـال والجـد =
ماهو براعي شين .. لاشـك محتـد =
قليل مال ويطلبـه هيـس(ن) اربـد =
افقم فم(ن) ناشف طويل(ن) مجرعد=
انخش عور .. وجهه من اللحيه اجلد =
والمال ضربة مـال مـا ينتقاصـد =
مهمـا تعـذر مايفـيـد امتـمـرد =
و حده حداه الله علـى غيـر مـاود=
قصيدة أخرى غزلية و طريفة للشاعر ناصر الفراعنة السبيعي عن الجمس نختم بها عشان ما نثقل عليكم <<<كلش ما ثقل :
حييّـت يـا جـمـسٍ جدادٍ مشـاريـه=
أربع ميا وخمسين مـن عنـد أهاليـه=
حالف حـرام إنـي لاسوقـه واعدّيـه=
جمسٍ ليـا شفتـه عزالـك تقهويـه=
تقـول مـعـزومٍ لحفلة(سـواريـه)=
سـوّاه لطـوال الشـوارب مسـوّيـه=
حرٍّ كفـخ مـن روس عالـي مباديـه=
يا ليت راعي الجمس يومـه يسمّيـه=
حيثه شنب يستاهـل المـدح زاهيـه=
من عزته ما ركبو أهـل الدلـع فيـه=
ولا ساقه الخكري ولا احمـر عتاريـه=
الجمـس أحبّـه حـبّ غـالٍ لغاليـه=
ومن حشمته لا جيت اسافـر اماليـه=
يا شيب عيني يوم آجي لـه والاقيـه=
خطـرٍ ليـا ناديتـه يقـول: لبّـيـه=
هـو ميّـتٍ فيّـه وانـا ميّـتٍ فيـه=
لا قمت المّس فـوق بديـه واداريـه=
ليته هنوف لأجل اضمّـه واحضويـه=
حالف يمين انـي لاابيعـه ولا أهْفيـه=
يوم ابيعه الجبان يبيع صاحبْه بجْنيـه=
حتى وأنا في المسجد الفرض اصلّيْـه=
وان كان عنّـي راح مانـي بناسيـه=
وتحـرم علـي نـوره حـرامٍ مقفّيـه=
يا وين أبلقى لـي حريـص ٍ أوصّيـه=
فـي ذمّتـي بغالـي الـروح لاافديـه=
ومن جلدي البالـي لاوقّـي سماريـه=
يا لايمي في الجمس غـادي وسفّيـه=
لي جمس مابه جمس مثلـه يباهيـه=
من شـاف فوقيّـه وطالـع بحدريـه=
رمز الفخامـه والاناقـه مـع التيـه=
ذي اس از انترناشيونال عنـد قانيـه=
مخروط والمخـروط صعـبٍ تحدّيـه=
ومكينتـه علـى أربعيـن وحوالـيـه=
لاقـام بنزينـه تشخـتـر سِواقـيـه=
وعلـى المكينـه والبساتـم يـودّيـه=
يـا دوب تحتـرّ البساتـم وتـوذيـه=
كـن لـون بنزينـه بصفّايـةٍ فـيـه=
وكن لون زيته يوم تكشـف معاريـه=
وقـزوز بالشكمـان رجليـه وايديـه=
ونـوع الكرونـه رقـم 7 بطـاريْـه=
وتروسهـا حجـم 4 يــا مقـدّيْـه=
مثل المسـدّس يبرمـه مـن يعبّيـه=
يفتـرّ سيـر المروحـه مـن تواليـه=
المروحـه هفّـت وضفّـت سوافيـه=
وسرنـدلٍ حمـر البسـاتـم تلالـيـه=
صـمّـام بوجـيّـه بـنـارٍ يغـذّيـه=
واليـا لـذع فيـه البليتيـن نـاريـه=
ومفتول دفرنسه عـن القـاع حاميـه=
الجمس كنّـه متّهـم جـاء محاميـه=
وكبـر المطبّـه مـا يغيّـر هقاويـه=
والاذرعـه عـن ميلـةٍ بـه تواسيـه=
وان شال حمـلٍ مـا يكثّـر شكاويـه=
كن رفرفيـن حـول حوضـه مداويـه=
وكن لـون كبّوتـه ولمعـة عراويـه=
وكنّه (كلوديـا شيفـرٍ) فـي تمْدريـه=
وكن زول بدْيه يـوم يغريـك صافيـه=
وكن الكفر لا جيت بالوصـف ابدّيـه=
ولا له شبيـهٍ فـي نعومـة تمثنيـه=
وكن نقشة جنوط الكفر فـي محانيـه=
وصقلة قزازه يـوم أردّ النظـر فيـه=
ولون المرايـه مـن يراعيـه يلهيـه=
ولو هي بهـا للعيـن فتنـه وتمويـه=
أصفى مـن اللولـو بمحّـار شاطيـه=
وبغمزة (سميره بنت توفيـق) أحلّيـه=
كنْ مقـدم الصـدّام لا قمـت اراعيـه=
وصدّام خلفـي مـاش شـيٍّ يحاكيـه=
مطربـلٍ مثـل الصوامـع عوالـيـه=
والا وليفـي واشقـر القـرن كاسيـه=
والله فـلا يلحـق موديلـه سفافـيـه=
مفضّله عـن نـوع لكـزس وكوبيـه=
ولـه تنـدةٍ بيضـا تعلّـت متاكـيـه=
وكن الجميحيّات مـن فـوق أعاليـه=
والا كما رجـمٍ زمـى فـي صحاريـه=
كن أيمن اصطبّـه والايسـر موازيـه=
وعيون من قـدّام توْضـي مساريـه=
لا شعشعـن والليـل مِـرخٍ علابيـه=
والا مرايـة حاكـمٍ عـنـد عـذْريـه=
جمسٍ شهر بين الامـم اسـم راعيـه=
يـوم اكتمـل نموذجـه عنـد واليـه=
وكــلٍّ هـتـف للـثـانـي ok ok=
صنعة خباث الروس (جورج ,وخوزيه)=
وان قال احد هو ليه شرقـك منحّيـه=
بأقـول ذولا مـا عليهـم مشـاريـه=
هذا خلاصة علـم مـن فكّـروا فيـه=
صنعة مريكاني مهـو (نـاه ناهيـه)=
ولو فيه احدْ يقـدر بصنعـه يجاريـه=
من عـذره الامريكـي اللـي مسوّيـه=
جمـسٍ يقـرّب مبعـدات المنـاويـه=
سحبـة غريـقٍ مـدّ للقـارب ايديـه=
واليا أشتغل كنّـه يذكّـرك يـا هيـه=
وكنْ ريحته لا دسْـت بنصـه تحمْيـه=
وكنْ حسّ ماطـوره ورنّـة بواجيـه=
وصوته إلى منّه مشى يـا ممشّيـه=
ونغمة صلنصيره ليا قمـت توحيـه=
وكنّه لمنّه قحّـص أجـراس تنبيـه=
واليا احترك وانته على القار مْوطيه=
لا كنْ صياحه يـوم بثنيـن تعطيـه=
وان طبّ صبخا وانت عنها تِهَاديْـه=
وان كان تعتع ألعـن آبـو مجانيـه=
واليا دعس صاروخ وان خفّ يشديه=
يظهر غميق الزيت من جوف واديـه=
وكنّ الحصا تحته ليا صـاح جنّيْـه=
والا هشيـمٍ دقـل سيلـه يدربـيـه=
جمسٍ مشى من كان قافيـه يعميـه=
ولولا البريك وفرملـه مـا يخلّيـه=
لا علّق البـوري وصاحـه يهدّيـه=
يهجل هجيل اللي عـراض مقاريـه=
واليا مشى مع راس طعسٍ يباريـه=
والا كمـا رقّاصـةٍ فـي كبـاريـه=
وفتـح لهـا مليارديـرٍ مخابـيـه=
وان مال مع دربٍ طعـوسٍ فيافيـه=
ومن سرعه الرادار ما عـاد يمديـه=
وان كان مرْ جاء في الردارات تشويه=
هم ما دروا ان الجمس صعبه مراميه=
صحيح من لا يعْرف الصقر يشويـه=
أرقـام طبلونـه خديعـه وتمويـه=
والا ترى العـدّاد يـا جاهـلٍ فيـه=
يـا لعنبـوا جـدّه وجَـدٍّ مثنّـيـه=
متوجّـهٍ ماهـوب يحتـاج توجيـه=
ويسوق عني ويوصل القلب أمانيـه=
وكل المواتر له عبيـدٍ وهـو بيـه=
مصنـوع لاولاد البشـوات ترفيـه=
جمس آتغزّل به ولا مـن مشاريـه=
ومن ذي وصوفه لو أقوصد وأغنّيـه=
واعداد ما يذري من الشـرق ذاريـه=
وسامحونا على الاطالة وسلامتكم