الـذاهـبـه { ناصر القحطاني + علي بن جخير } !!

[الوافـيه]

احيانا تعجز الكتابه وتتساقط الحروف وتتلاشى الافكار فابحث عن الكلمات والجمل فلا اجدها !!

واجد نفسي في صراع مع اللغه حتى اجيد تقديم ما انا انوي تقديمه الان!!

لا تتعجبوا من ترددي هذا !!

وخوفي الكبير من هذا التقديم !!

فانا اليوم اقدم الابداع ...

اقدم الشعر الحقيقي ...

فـ اقول لكل الشعراء والمستشعرين كفى هنا يتجلا الشعر ...

هنا يتضح الابداع ...

فلا مكان الا لجزيل المفردات ..

واعذب الصور ... واقوى البحور !!

اليوم فقط ستكونوا على موعد مع تعانق الابداع مع الابداع لـ ينتج لنا من هذا التعانق هاتان الدرتان!!

قرأتم ملايين القصائد!!

استعذبتم ملايين الابيات!!

ذهلتم بالعديد من الصور الشعريه!!

ولكن ما ستشاهدونه اليوم ... وتقرأونه مختلف جداا... لن يمر عليكم مرور الكرام !!

سيحلق في نفوسك طربا ليعتلي قمة عقولكم ويجلس على عرش ذائقتكم بكل شموخ !!

هذان الفارسان يلتقيان في هذه المجاراه ... وهنا فقط يتحدث الشعر!!





فـ الاول ثبت قواعد الابداع واسسها وكان مدرسة لكل من يريد ان يكون الابداع منهاجا له !!

لم يسعى للاعلام والظهور وبرغم كل ذلك سلط الاضواء عليه !!

علق الملايين من قلوب الجماهير فيما يقدم من قصائد !!

كان ولا زال شاعرا لامس مختلف الشرائح من النخبة الى البسطاء !!

كلما ظهر له جديد وجدته يتردد على السنه الناس حفظا واعجابا !!

لقب بـ شاعر الاندلس واستحق هذا اللقب بجداره فهو مزيج بين جزالة وشاعرية وثقافة الاولين وابداع القله من شعراء هذا الجيل !!



ناصر القحطاني الشاعر الجزل والانسان الخلوق جمع هذه الصفات ليقول للجميع بان الشعر اخلاق ورساله ورجوله !!

والشاعر الحقيقي يفرض نفسه بهدوء واحترام من خلال مايقدمه دون الحاجه للصخب والحروب والنزااعات وتسيد صفحات المجلات فالشعر من يفرض نفسه ومن يحترم شعره سيملك اعجاب الجماهير وحبهم واحترامهم !!

ما قلته عنه الان ليس ضربا من ضروب الخيال بل هذه الحقيقه عندما نريد ان نتحدث عن هذه القامه وهذه الشاعريه وهذا الاسم ( ناصر القحطاني ) .... شرف للحروف والكلمات ان تكتب عنه !!




والثاني امامه باب الشهرة مفتوح على مصراعيه فيرفضها !!

يخدمه اسمه ومركز عائلتة وشهرة اخيه الاكبر فيرفض استغلالهم جميعا بالظهور!!

لم يفكر يوما بالشهره فـ اعجابه بـ نفسه يكفيه ويرضيه !!

نشرت له ابياتا رغما عنه فاذهل المتذوقين ... وألجم الافواه ... وادهش العقول ... ليجبرهم على المطالبة بالمزيد من هذه العذوبه وهذا الابداع التي تحمله ابياته بين طياتها !!




استجاب لمطالبهم وبين الحين والاخر ياتي ليسقي عطش انفسهم بشيئا من بديع الابيات فيطربون ويثملون ويرتوون ابداعا ولما لا وهو ( وكيل الابداع ) وهذا الاسم ( علي بن جخير ) ما هو الا امتدادا لمدارس العظماء !!

فهو لا يكتب لمجرد الكتابه بل نجد الحرفيّه واتقان الشاعريّه في كل مفرده يكتبها وكل صوره يرسمها ليمتع عقولنا في تحليلها وارتشافها !!

التقوا اليوم وجمعتهم قصيدة (( الذاهبه )) ومن منا لا يعرفها ويحفظ ابياتا منها واستطرب عندما تغنى بها الفنان خالد عبدالرحمن وصدح بها بصوته وساهمت كثيرا في انطلاقته وشهرته !!

(( الذاهبه )) من اقوى الابيات واعظمها!!

و الكثير من الشعراء خاف من مجاراتها ومنهم من عجز !!

منذ سنين ولازال بريق الذاهبه واضح لـ العيان !!



وهاهو وكيل الابداع يتحفنا بمجاراتها بابداع وثقه تجعلنا نصفق طويلا احتراما له على هذه الشاعريه الفذه وتقديره لمتابعينه ومحبيه واحترامه لذائقتهم في هذا النص الرائع!!

وبالطبع ما سـأضعه بين ايديكم سيؤكد لكم صحه مااقول لـ يتضح لكم بان النص الاول والثاني كلاهما لا يقل جمالا عن الاخر بل بالعكس فاني اجد بان النص الثاني ماهو الا امتدادا لما سبقه ليثبتوا لنا:


{{ بان لكل جيل مبدع }} !!






دعونا نبحر قليلا مع الذاهبه لـ شاعرها : ناصر القحطاني !!

الله اللـي راد والعقـده قضـاها اللي عقدهــا=لا على الدنيا سـلام ولا لباقـي العمـر زينــه
الفضـا ما كنّـه إلا خميـةٍ طاحـت عمدهــا =والفرح ما كنّه إلا شيـخٍ انـقصـت يـديـنــه
والعمر قطعة زجاج إنكسرت ولا طال أمدهــا =والعرب في العيـد بدمـوع اليتامـى مستهينــه
والشوارع لفّـها ثوب الظـلام اللـي هجدهــا =والبيوت أطـلال من عقـب المحبـه والسكينــه
والشتـا والليل والبرد وسما يصـرخ رعدهــا =والعيون اللـي ورا الشبّـاك مذعـوره حزينــه
طوّلوا في الكهف الأصحاب وبقت روحي وحَدها=كنّها في كـوكـبٍ ثانـي خـلا من ساكنينـــه
الوداع اللـي بعلـم العيـن يعْبَـر من رمدهـا =والوداع اللـي بـلا علم لقفص صدري غبينــه
والوداع اللـي بلا رجعـه علـيّ أمـرّ وأدهـا =والله إنّــه غرغرت سـمّ وسكاكيـنٍ سنينــه
والعنود اللـي جفيـت النـاس والدنيـا بعدهـا =مدّت الفـرقا لغاليهـا وهـي تعطـي الثمينــه
وينها كيف تركتني ليـه ما جـت في وعدهــا =والقمر لي طـلّ خابرها تجـي بينـي وبينــه
رحت أنادي وأتلمّـس في مهـب الريـح يدهـا =كني حصـانٍ بلا صاحب طوى البيدا حنينــه
رحت أصيح الصبح وينه والعرب ما ردّ أحدهـا =ما سمعت إلا صدى صوتي يقول الصبح وينــه
كنّهم من يـوم ذيك الشمـس غابـت عن بلدهـا=طلّعوني في النفـود وصكّـوا أبواب المدينــه
كنّهم من يـوم ذيـك الذاهبـه محـدٍ وجدهــا =كل رجـالٍ من الشرهـه قلع في الدرب عينــه
أثرهـا ماتـت وماتـت كل فرحـه في مهدهـا =والربيع أقفـت به اللي كانـت التـاج لجبينــه
جاورت عقب الحدايق حفــرةٍ مااقسى لحدهـا =حفرةٍ مانـي مصـدّق كيـف ضمت ياسمينــه
للحزن فينــي مثل ما للطهـاره في جسدهــا =وش أسوي لا فتشت اللي لها وســط الخزينــه
زخرفت حلم وبنت له مسكـن وسمّـت ولدهــا =آه لـو غــرّد ولدهـا فـي خميلـة والدينــه
عاهدتني واظفـرت بيميـنٍ أقـوى من عهدهــا=والصبي لا خير فيه إن كـان مـا نفّـذ يمينــه
ماتِـتَـقَّـى عـن رثاها عرقٍ أكتـظ بشهدهــا =ولا تبقى خلف قضبـان الجفـن عذرى سجينــه
كيف عند العالم أيام العـزى مِحصـى عددهــا =وإلا لي طالت شهـور والله أعلـم كـم سنينــه
لا الثرى فيها نبـات ولا المشـي خفّف نكدهــا =لا السمـا فيها طيـور ولا البحـر يمّه سفينــه
لا القمر هذا مساه ولا العصـي هـذا رغدهــا =لا الزهر هـذا شـذاه ولا الذهـب هـذا رنينــه
قالوا الشيخ الفلانـي مرجِـع القـوم وسندهــا =قال يبشـر بالعـوض والعلـم جينـا ناقـلينــه
ساق لك بدر البدور اللـي نشدهـا من نشدهــا =جادلٍ هـزّت عـروش وخيِّبَـت روسٍ ذهينــه
قسمها في رسمها في جسمهـا إلا في رِشَدْهــا=وأسمها إن جا للغضب قومَهْ, على الألسِنْ رِطينـه
اترك النـاي وعطيـت شيخنـا غنّ لسعدهــا =وانبسط يا عمْ وانسى اللي ورا التـربـه دفينــه
قلـت ولصـدري تناهيـتٍ تروِّع من شهدهــا =آه واويـلاه مـن يجلـب علـى قلبـي ظنينــه
خلوا أغلى ذاهبـه ترعـى ربيـع اللي فقدهــا =والعطـا راعيــه محـدٍ صوبـه الله لايهينــه
لو ضمنت الجنّـهْ بتفاحــة القلـب وشهدهــا =قلت من بكـره عسـى مجنونهـا تاقف سنينــه
الله اللـي راد والعقدة قضـاها اللي عقدهــا =لا على الدنيا سـلام ولا لباقـي العمـر زينــه

هذه هي ( ذاهبة ) ناصر القحطاني منذ سنين وهي تحافظ على مكانتها وتزداد عظمه مع مرور الوقت فمثل هذه القصيده لا يكتبها الا القله!!

وها هي مجاراة وكيل الابداع : ( علي بن جخير ) لها !!

الله الي راد والدنيا وجدها من وجدها = ياسنين الحزن يوم ان الفرح غابت سنينه
الليالي نورها من ضيقة الخاطر جحدها = والنهار اصبح سكون الليل ساكن في جبينه
والمدينه دمعة اطفال الحجاره في مهدها = اه ياكبر الظلام الي هجد نور المدينه
والفرح صفحه فتحناها وضيعنا عددها = مثل ماضاعت من سنين العمر فرصه ثمينه
والهنوف الي تحديت العذارى في رغدها = ماتت وخلت بقايا انسان للذكرى رهينه
الخبر صدمه تهز النفس وتقصر امدها = ودمعة الفرقا بدمعات الهزيمه مستعينه
ليه ماتت كيف ماتت ليه ماوفت عهدها = والسؤال يعيد نفسه والاجابه مستهينه
ياسنين الظلم وجروح المتاهات ونكدها = مابقى فالناس خير ولا بقى فالارض زينه
لو بغيت اعيش كيف اعيش فالدنيا بعدها = كيف اعاصر عالم النسيان والبسمه دفينه
كنت اعيش بعالمي مابين مبسمها ويدها = كنت اساير نبضها والشوق مابيني وبينه
ويش اقدم عذر للجوال الا منه فقدها = ويش اقول لنغمته والصمت عالق في رنينه
ويش اقول لدمعتي والعين يغشاها رمدها = كيف اعزي قلبي ودقاته اسرع من حنينه
وين اروح وكل منظر حي ذكرني شهدها = وين اهاجر من عذاب الذات والنظره حزينه
الحزن عم البلاد وماتبقى في بلدها = غير صوت الله واكبر فالمساجد رافعينه
طفيت انوار الشوارع والحزن كسر عمدها = والمنازل خاويه والناس تغشاها السكينه
الونين الي صداه يفرق الام وولدها = كني اول شخص فالديره صدى صوته ونينه
والشواطئ تنتظر مرسى السفينه في وعدها = والبحر ينشف وضيع حلم ركاب السفينه
الفراق الي برجعه يلحق الشرهه جهدها = بس انا مالي من الشرهه سوى صبر وغبينه
الحياه الي تبقت حزنها يقتل سعدها = والسعد لو هو بقربي قلت ياويني ووينه
انتهت قصة عذاب ودفتر القصه رصدها = وابتدى جرح الحزن والدفتر الله لا يهينه

هذه هي ( ذاهبة ) علي بن جخير لا اعلم ماذا اقول عنها فـ لازال تأثيرها علي يجعلني افقد القدره على الكتابه !!

بصراحه لم اشأ ان ينتهي هذا الابداع فـ لم استمتع بأبيات بقدر استمتاعي بهذه الفاخره لله در علي بن جخير لله در علي بن جخير!!

[ليــه يازمـــن]

الله علـــــــــــيك بصراحــــــه شعر رائع ماقصـــــرتي وقلم رائع ومجهــــــــــود كبــــير تشكرين علــــــــــــيه وتقبلــــــــــــي تحيـــــــــــاتي

[سنجآر]

صح لسان الشاعر علي بن جخير

مع اني أشوف الأبيااات عاااديه جداً من غير قصور في شاااعرها

و الكثير من الشعراء خاف من مجاراتها ومنهم من عجز !!

شدعوه

والقصيده على نفس لحن قصيدة سلطان الهاجري .. يا لحون العود

وصح لسان بن جخير مره ثاااانيه

ووافيه يالوافيه

[" مــــابه جديــــد "]

الذاهبه .. علي القحطاني يعجز عنها القول
الذاهبه .. ابن جخير ابدع وبدع وبدع

ولا اروع من القصيدتين الا تقديمك الي نشف ريقي

لااهنتي ع المجهود الطيب والذوق الراقي

[سقام]

مشكوره والصراحه مجاراة وقصيدة ابن جخير اقوى من قصيدة ناصر القحطاني

[ثامر تركي]

الكل مبدع ...

القحطاني
وبن جخير
والوافيه

شكرااا ع الجهد المبذول
والاخراج الممتاز بانتظار
جديدك دائماااااااااااااا

[العـــسر]

والفرح صفحه فتحناهـا وضيعنـا عددهـا=مثل ماضاعت من سنين العمر فرصه ثمينه

كنت اعيش بعالمي مابين مبسمهـا ويدهـا=كنت اساير نبضها والشوق مابينـي وبينـه

ويش اقدم عـذر للجـوال الا منـه فقدهـا=ويش اقول لنغمته والصمت عالق في رنينه

الفراق الي برجعه يلحق الشرهـه جهدهـا=بس انا مالي من الشرهه سوى صبر وغبينه

الحياه الي تبقـت حزنهـا يقتـل سعدهـا=والسعد لو هو بقربي قلت ياوينـي ووينـه
انتهت قصة عذاب ودفتر القصـه رصدهـا=وابتدى جرح الحزن والدفتـر الله لا يهينـه

الله الله


أبيات في غاية الروعه لاهنتي عليها يا الوافيه


وصح لسان كل من القحطاني وبن جخير





تقبلي مروري

[غالي الاثمان]

صح لسان الشاعر وتسلم عالنقل الرائع