الخير يخص والشر يعم 
--------------------------------------------------------------------------------
صباح الخير على زميلاتنا الطالبات
و معلماتنا العزيزات
مدخل ×*×
احد العلماء يقول عبارة جدا جميله من هالعبارة
تحمست اني ارجع انزل موضوعي اللي قفله المشرف
يقول ( اذا احسست بالاحباط يوما لاتستسلم بل تحرك
وارجع الى محور الاحباط نفسه وعزز ثقتك بذاتك وابدا من جديد ) من
هالعبارة حقت العالم ذا وانا فيني دافع قوي ارجع اصلح الاحباط واعزز ثقتي بنفسي
وانزل هالموضوع ظغطت على ايقونه اضافه موضوع ونزل هالشي
في يوم شتوي والسماء تمطر والوجيه فرحانه ومبسوطه
والشيطان ماله حس ولاخبر كنت جالسه انا وصدقيتي
بالحوش انا احكي لها احلامي وهي تحكي لي احلامها
طبعا احلامي مالها دخل بالموضوع بس بقولها لكم
اعرفكم الفضول عندكم ماشي مليونين احلامي اني
اصير مثل الربيعه لي صيت مايلعب واساعد الناس
واحلامي خير في خير يالله من فضلك وصدقيتي
احلامها كانت انها تعرس رجال عندة فلوس يصبحها
بخاتم الماس ويمسيها وهي بدوله وراء القارات يخلي الدنيا
ملكها لاقالت ابي لبن العصفور شاتها برجله وقال شلون
عصفورتي تشرب لبن العصفور وهي عصفورة
والخ من كلام رويات شمس السديري يالبى قلبها
واحلام كثيرة المهم كنا في بحر احلامنا الورديه الا دقايق
والشيطان دخل الحوش وشب الفتنه بين وحدة وصديقتها
صار الحوش مثل ساحه ثيران ماشوف الاالناس تصارخ
وسب ولعن واشوف بنات يرفعون ثيابهم ويرقون الدرج
يشوفون المضاربه من فوق جيت بشوف وش فيه لقيت
بنتين يعطون بعض من هالكفوف وهالمخمسات والركل بالرجول
لين صارت كل بنت تحمل في وجهه خريطه المملكه باقي صورة ونرزها بالاطلس دقايق
وجات المديرة ومعها مسطرة اطول من طريق الحجاز
وضربت البنات اللي يتفرجون وطلعت البنتين الادارة
وكملنا الفسحه وكل وحدة تتراعد خايفه من اللي صار
خصوصا ان المديرة شرسه وقبل تخلص الفسحه
جات المديرة وقالت وقوف ومسكت الميكرفون وقالت
خطبه طويله عن الانوثه وان اللي صار من شغل
عيال الحوراي ونزلت قرار هالقرار ينص على الاتي
1| منع جميع الطالبات من مسيرة الاحتفال اللي تقام كل عام لطالبات الثالث متوسط
2| منع طالبات الثالث متوسط من الفسحه في فناء المدرسه
3| حرمان الطالبات اصحاب المشكله من شهادة حسن السيرة والسلوك
انا عاد خلاص بتجيني الصيحه والله يعني مسيرة 3 سنين
وكرف كل صباح وانا شايله الشنطه اللي بوزن ادمي ميت
واشيلها على ظهري وانا احلم بس في هالمسيرة اللي البس فيها
الروب الاسود ويارض نهدي ماعليك قدي وامي تناظرني
وفي عينها دمعه من الفرح ان بنتها تخرجت كذا كله واخرتها
بسبب تصرفات غبيه من بنتين يروح كل شي هباء منثورا
واتوكل على الله واروح للمديرة واسلم عليها وانزل
دمعتين وهميه لزوم الرأفه والرحمه واقولها ليش
كل احلامي تطيح قدامي كذا على سبب تافه ناظرت فيني
وقالت ياحبيبتي سمعتي بمقوله الشر يعم والخير يخص وهذا احسن رداع لكم
جيت بقولها ليش واحتج قالت على فصلك
ومن بعدها ضاق صدري مرة وكرهت هالعبارة مرررة مررة
ولاصارت مسيرة ولاهم يحزنون
عبارة ( الشر يعم والخير يخص )
من اشهر واغباء العبارات اللي سمعتها بحياتي والله يسامح من طلعها
او نشرها وخلى العالم سوداي بعيونا حنا دايم نقول هالعبارة
رغم تاكدنا ميه بالميه انها عبارة خاطئه لان دينا الاسلامي
يعارض معارضه قويه هالعبارة واقوى دليل على هالكلام
قصه النبي مع اهل الطائف يوم تمنى بعد كل الاذى اللي صار
وبعد كل مالقاهم منهم ان يخرج من اصلابهم من يحمل هذا الدين
فكيف بالله عبارة مثل هذي تتماشى مع خلق النبي
صلى الله عليه وسلم ورسالته الاسلاميه
العبارة ذي فيها من السودايه والظلم مالله به عليم
كيف الشر الله المفروض صاحبه ينبذ ويعاقب بلحاله
يضلم كل اللي معه ويطلق حكم الشر على كل من له
علاقه بصاحب هذا الشر فيه امثله في حياتنا على هذه العبارة
مثل السارق
هذا جريمته كبيرة
والمفروض يعاقب بلحاله بس عندنا في مجتمعنا العكس
لازم كل اللي حول السارق ينولهم من الاذي جانب وتصير
هالسرقه وصمه عار فيهم لين يرث الله الارض ومن عليها
لان المجتمع فرض عليهم عبارة الشر يعم والخير يخص
اسر الارهابين
يتعاقبون على ذنب هم مالهم اي دخل فيه
مثل الابو يكون ارهابي وش ذنب الاطفال وش ذنب الزوجه
المجتمع ينهش فيهم نهش لا مدراس يعاملونه مظبوط لاوظايف لاقين
نظرة المجتمع لهم على انهم احقر من الحقارة نفسها هم يتعاقبون على ذنب غيرهم
ذنب مالهم اي دخل فيه بس لان المجتمع فرض عبارة الشر يعم والخير يخص
الفتاة المغتصبه
هي اللي غلطت بنفسها او اعتدي عليها وش ذنب
القبيله كلها تروح سمعتها في الارض ابوها وامها و
اخوانها وخواتها وبنات عمها كل من له صله باللي صار
عليها الاغتصاب تصير سمعتهم تحت الرجل هي غلطت
والمفروض تروح دار الرعايه وتاخذ جزاها بس حتى لو صار
هذا كله وصمت العار بتلحق حتى عيال عيالهم عشان ان الشر يعم والخير يخص
وغيرها من الامثله اللي لو سردتها جلست شهور ماحصيتها
مخرج ×*×
رسالتي البسيطة: لما لا نجعل الدافع بعموم الخير هو
المفتاح لكثرة فعله؟ لما لا نجعل الناس يفعلون الخير
لانه يعم ويبتعدون عن الشر لانه سيكون وحيداً بصحبته؟
ففطرة الانسان كره الوحدة. فامنا حواء لم تترك سيدنا
آدم وحيداً! عزيزي القارئ عزيزتي القارئة, نبدأ اليوم
رسالة جديدة بمفهوم جديد نورئه لابنائنا ونزرعه بيننا
ونرسخه في عقولنا.
الخـــــــير "يعــــــم" والشــــر "يخــــص".
* نقلت هالموضوع لأني ألآحظ كثيير من مدرساتنا يقولونها
10-02-2011, 03:27 PM
العرض العادي
المواضيع المتشابهه
