|
فــــيــــصـــل بن عــبــيــــد... معـلـقـة دارنـا يـبـريـن...((أطوّل من 130 بيت))...
قصيدة للشاعر فيصل ابن عبيد آل جابر المري...
و هو شاعر قصائده جميلة جداً و لكن لا ينشر..
و القصيدة أعجبتني قلت أكتبها لعلها تعجبكــم..
الذلول اللي كما الريم الجفولي=ذاير من كل صوت و كل زولي
السعد عساه فالش و القبولي=بأمر رب لا عطا يعطي الجزال
من بلد (يبرين) (للدوحة) تعنـّـي=درهمي بي يا ذلولي و أستعنـّـي
راكبش ما هو على الشطة يونـّـي=ذاق من دنياه مر و ذاق حالي
دارنا (يبرين) لو جارت مريفه=غير الأحوال الثقيلة و الخفيفة
تاخذ من الحال يمكن بالنصيفة=و العمر لو طال تاليه الزوال
حب (يبرين)(ن) سكن في نون عيني=ما تغيره الليالي و السنيني
كسب جداد(ن) خذوها باليديني(1)=من وزاها جات له كن و ظلالي
(ابن ثاني) يوم جا من غرب جاها(2)=راض فيها يوم جاها من رخاها
تحت ظل نخيلها من برد ماها=مع رطبها ميها عذب زلال
بعد ما ريّح و جهز من رطبها=الذلول اللي تحت رجلها شعبها
و الهجن للي يبي قلبه جذبها=و أرتحل لا هوب شرق ولا شمالي(3)
و يوم جا (ابن سعود) من دار (الصباحي)(4)=في ضيفتنا تريّح و أستراحي
لين نوّا بإنطلاقه و المراحي=(للرياض) اللي تحت حكم إحتلال
دارنا عاد العرب في المهمهيّة=كسبنا بالسيف ما جتنا عطيّه(5)
فوق سرج الخيل و شداد المطيّة=يوم عاد شدادها ما به ميالي
(آل مرة) ما لهم غيره بلادي=يوم عاد الناس في حال السهادي
من يضيع بدار (مكة) ما ينادي=كون يا (يبرين) و التصويت عال
دار (شيخ رجال مرة) بالتمامي(6)=و من ورا (مرة) يقود رجال (يامي)
يشهد التاريخ ما فيها كلامي=مقدم لرجال (يام) أول و تالي
شيخته ما هي قريبه و محدوده=شيخته قدها على تاسع جدوده
و الشلايل من بني عمه تروده=ما يبرك للثقال إلا الجمال
مثل (ابن حثلين) ما فيها غصيّا=يوم وصّى ثم زهم راع الحميّا
أعتزا ثم قال (أخو صبرة) و هيّا(7)=واصلينك بالرجال و بالحلالي(8)
يا ذلولي درهمي بي و أسرحي بي=كن جنبش تنهش نيبان ذيبي
حد (ابو سمرة) ترا ما هو قريبي(9)=عاد من دونه مراديم الرمال
لاح براق خذت قلبي قنوفه=و أنشعفت و رحت له قدام أطوفه
يا ذلولي ما على الجلسة حسوفه=لا طرالي يا ذلولي ما طرالي
غير يا راع الزمل تلوه تلّي=و ما جذا من زملنا خله يولّي
العوض طلق الحجاج المستهلّي=نفحة منه توصلنا العلال
أدخلوا مع مركز شكله فظيعي=المباني فوق و الشارع وسيعي
و من وراها يبتدي خط سريعي=(ابو سمرة) خلف و (الدوحة) قبالي
الموظف يبتسم لا جيت صوبه=يكسب إعجاب الأوادم من أسلوبه
طبق إرشادات و الناس إعجبوا به=حسب الأمر يسير رجال(ن) مثالي
و كل خمسة كيلو(ن) تلقى معدّة=الجديد يحط و البايد تهدّه
ليلها مع يومها كله مكدّه=(فور تايم) كسبها من الأشتغالي
الشرك شغالة(ن) في كل حزّة=شي تجديد(ن) و شي تو قزّه
دام عز اللي بعثها دام عزّه=ثوّر غبار المعدات الثقالي
للبلد نهضته نهضة عالميّه=و للوطن و أهل الوطن فيه الحميّة
قال أنا المهموم بأحوال الرعيّة=في سباق مع الزمن حامي و صالي
نهضة العمران في وقت وجيزي=تلفت أنظار (العرب) و (الأنقليزي)
و المواطن في الرخا عايش عزيزي=ما يفكر في الفقر ولا يبالي
موتره فكسار و الرنج الجديدي=من سبب الأسهم غدا عنده رصيدي
أمر أمير(ن) نظرة فوق و بعيدي=ما يقول الشعب هذا له و ذا لي
أمر أمير(ن) سهل الشي العسيري=قال ما أبي في الوطن يبقى فقيري
رحمة(ن) تشمل صغير مع كبيري=أرتهى شعبه من الرزق الحلال
موّل أقصى الغرب بالغاز المصفـّا=دولة (أمريكا) دعاها ما تخفـّا
أشهد إن به قايد كفـّا و وفـّا=من خزاين الأرض صوّت للريالي
و (كوريا أقصى) الشرق موّلها و موّل=دولة (بريطانيا) بشي(ن) يهوّل
و دولة (اليابان) حصتها تحوّل=قال دوكم حصة الغاز المسال
دولة(ن) صغرى لكن تلحق لحوقي=للسحاب المعتلي قامت تتوقي
توق فرخ(ن) ضايقه مسك السبوقي=لا تنهّض للطويل من المعالي
مع عمالقة الدول قامت تعامل=قادها قايد قيادي(ن) و صامل
قلمه شغال من بين الأنامل=عن تطور دولته ماهوب سالي
السياسة و الحماسة في سموّه=و الشهامة و الكرامة و المروّة
و السيادة و القيادة في هدوّه=و الشجاعة ويش ابو (زيد الهلالي)
وميته تشبع بها الضبع الجويعة=و التواضع و السماحة له طبيعه
و فزعته للي يدورها سريعة=صامل الفزعات لا يمكن يمال
يوم (باكستان) جا الزلزال فيها=عانها جزل العطا و أرسل عليها
قال أجور(ن) وافره حنا نبيها=سنة(ن) حسنة و زينة و أجرها لي
و يوم جا (أمريكا) الفيضان و دمرها=قام و أثبت فزعته على كبرها
و أبدت لشخصيته خالص شكرها=صار خير للبعيد و للموالي
عارفين و باخسين(ن) ويش ذاته=من طبايعه القديمة في حياته
العفو و الصفح شي من صفاته=تشهد الوقفات ما فيها جدالي
إن زعل ما هو يخاف ولا يهابي=وإن رضى ما هو يفكر في العتابي
و إن طلب يعطي لو إن حتى الرقابي=وقفته يردع بها الجال الهيال
في المجالي يوم (عبدالله) عنا له=و طلبه منه كسب فيها الجمالة
أعتقه و أعفاه ثم أطلق حباله=قال يا (ابن الهاشمي) هاك المجالي
و يوم (بوتين) أرسل المرسول صوبه=طالب(ن) العفو منه و المثوبة
قال يا (بوتين) شلينا العقوبة=ما نبي منهم جواب ولا سؤالي
به وصوف حيّرت كل الخلايق=ما نقول ولا نعد إلا الحقايق
صاروا العالم معه مثل العلايق=ثبت الدستور لأجل الإعتدالي
و قال للإعلام قول اللي تريده=قول في التلفاز ولا في الجريدة
شعب حر و عايش عيشة سعيده=و إن رضى شعبه حكيم الراي نال
الرجل ذو همة تعتز الأمّة=يا (حمد) إن قلت قمة فأنت قمّة
فيك عزم و فيك حزم و فيك همّة=و معك حظ و طيب راس و طيب فالي
صاحب الإنجاز جعل الله يدرّه=و النعم بك يا (حمد) مليون مرّة
تنثر اللولو على البحر و تثرّه=شي واقع كنه من نسج الخيال
و شاقني صيتك و جيتك يا المقرّا=أدعس الديبان ولا أنا آتدرّا
لأجل أوصلك الرسالة بآتجرّا=و المغامر بين قوسين أحتمالي
وضعنا حتى لو إن صار الضحيّة=ما يهم يروح من شانك هديّة
المهم أوصلك حاجة خفيّة=شي أسولف به على حالي لحالي
فزعتك يا ابو الأرامل و اليتاما=حلم ما هو مثل سايرت الحلاما
و من طلب فزعتك والله ما يلاما=أنت كنك طويق من بين الجبال
مطلبي واضح ولا عاده بسرّي=فزعتك يا المحزم اللي ما يعرّي
يا سندنا يا ذرانا اللي يذرّي=لا أستخف القلب من قشع الشمالي
يا (ابو مشعل) جيت منتل و هاوي=مثل ما يكفخ مع الجو النداوي
فيك يا أمير العطا كبر الهقاوي=يا مورد ؟؟؟؟ ؟؟؟ الحبال
لأجل أعبّر عن شعوري لك و أبوحي=ساقني صوبك يا (ابو مشعل) طموحي
من محبتك و غلاك أرسلت روحي=ما أقتنعت أحد(ن) يوديها بدالي
مثل ما لك عند خلق الله قيمة=أصفط ألك أجور عند الله عظيمة
من غلاك و من محبتك القديمة=جيت أوضّح شي عندك ما يقال
أدري إن الوضع هذا ما وصل لك=و أدري إنه لو وصل لك جاه حلّك
العفو و الصفح قدها عادة لك=تاتي العفو بشهامة و إرتجال
و صافط ألك دعوة(ن) من قلب شيبه=لا تحرّا بالفرج فرقا المصية
شايب(ن) عاجز فقد من يعتني به=من ظروفه صار في شبه إعتزال
شايفين من ملامحه الكأبة=يمكن إن دعوته تصبح مستجابه
الله إنه لا يحرمك من ثوابه=لا توجّه بالدعاء و الإبتهال
و لو تشوف الدمع بعيون المسنّة=من عجوز(ن) في الزوايا مستكنّه
ما جداها كون تال الليل ونه=و دمع حزن(ن) من على الخدين سال
و لو تشوف الطفل مثلي يوم شفته=من ملامحه الحزينة ما عرفته
ألتفت له يا طويل العمر لفته=لفته تصبح غناة من السؤالي
و لو تشوف البنت ما تبغا الزواجي=جوها كله كأبه و إنزعاجي
لا هواية للزواج و لا مزاجي=فقدت جمع العمومة و الخوال
دمعة الأطفال و العجز الثكالا=في مصب كبودنا قامت تتالا
و أنت والي الأمر من غيرك قيالا=ما لنا بعد الولي غير أنت وال
ما علينا دام حنا خابرينك=يا طويل العمر حنا طالبينك
كلنا يا رجال (مرة) في يمينك=حاذفين(ن) بالشماغ و بالعقالي
ولا تحرّا الواسطة منّا و منّا=أنت ابونا و أنت اخونا و أنت منّا
و أنت من غيرك على العسر نتمنّا=لا تحدتنا مقادير الليالي
و أنت شخص عند شخصك واسطتنا=على وادي(ن) محبتك احسدتنا
وقفتك صوب الثريا وصلتنا=شيخنا الكامل و لله الكمال
آه من شي(ن) تخفيه الضماير=يا (ابو مشعل) شي فيه الفكر حاير
نعتزي بك ثم تضايقنا العباير=يا زبون الحرد حمّاي التوالي
خابرين(ن) فزعتك تطفي اللهايب=و وقفتك تفك شربكة النشايب
و هيبتك منها صليب الراس هايب=ترتجف دونك فطاحلة الرجال
أنت عسر(ن) و أنت جسر و فيك لينه=و أنت قايدنا و ربّان السفينة
ما أحد(ن) غيرك لنا سوا مدينة=جعل من ينسا جمايلك الزوالي
أنت من ينسا جمايلك الكثيرة=في العسيرة و الصغيرة و الكبيرة
كون منهو ما معه دم(ن) و غيرة=ذاك راسه من زكاة العقل خالي
و أنت رقيّت الرجال العسكراني=كلهم جا له محل و مكاني
و أعتلى في العاليات من الطماني=جات من جودك و جا له راس مالي
أنت طيبك عندنا ما ينتغبّا=و المطالب دايم(ن) عندك تلبّا
و حب شخصك في الضماير له مصبّا=طابع(ن) بقلوبنا ولا يزالي
(آل مرة) كلها دارك وطنها=حدر أوامرك أنت تامرها و تنها
الله اللي عزها و أحسن سكنها=بالأمير اللي طموحه فوق عالي
كلمة بتجيك ما تلقا بدلها=في لزومك ما تنادينا و نلها
و كل ابونا (خيّر العليا) و أهلها=و عودنا في اللازمة مثل العيال
من رفع مقدارنا نرفع مكانه=شانّا في العسر ولا اليسر شانه
و حن حزامه لأرتخى حبل البطانة=لا أفتضح عند البشر خف الثقالي
نثبت و نرسي إلا جات الصمايل=لا تعلينا على قب الأصايل
مثل ما في (الخفجي) أثبتنا الفعايل=(آل مرة) في النعت هل الأنفعال
سيدي حنا لكم رهن الأشارة=لا غدا في الوقت دورة و إستداره
و حن هل الفزعات و أحنا للجسارة=مخلصين و جاهزين(ن) للقتالي
عادت أعيادك على خير و مسرّة=جيت أوصل لك سلام رجال (مرّة)
عد ما في الكون من حبّه و ذرّة=و عد ما يبدا من الشرق الهلالي
و السلام ختام و أطلبك السموحة=عند مثلك كل ما نخفي نبوحه
و الرجل من منطقه يدرا بنوحه=قبل لا ينهي جوابه و المقال
1-يقصد يوم آل جابر آل مرة (و ليس كـل آل جـابـر) و آل سـفـران
العجمان (و ليس كل آل سفران) يوم طردوا الدواسر من يبريــــن..
2-يوم خرج ابن ثاني من حوطة بني تميم و أقام فترة في يبريـــــن
و هو في طريقة إلى شبة جزيرة قطر..
3-(لاهوب شرق ولا شمال) يقصد إنه ذهب بأتجاه الشمال الشرقي..
4-يقصد الملك عبدالعزيز وهو في طريقه لفتح الرياض..والله أعلم..
5-الملاحظة رقم (1)..
6-يقصد الشيخ المرضف شيخ آل مرة..
7-أخو صبرة : عزوة الشيخ علي المرضف و المراضفة بشكل عام..
8-(واصلينك بالرجال و بالحلالي) لا أعلم أي معركة يقصد بها هذا
الشطر لكن آل مرة كانوا مع العجمان في معارك واجد ولا يستغرب
ذالك منهم..
9-حد ابو سمرة : و هو الحد السعودي القطري..
10-لاحظ ورود كلمة (أمير) و (حمد) بشكل متكرر في القصيدة و
يقصد بها الشيخ حمد ابن ثاني حاكم قطر..
مكان علامات الإستفهام لم يكن واضح في التسجيل..
و في آخر القصيدة يشرح الشاعر معاناة آل غفران الله يفرج كربتهم
و يفك عوقهم و يزيل مصيبتهم... اللهم آميـــن...
دمــــتــــم بــــــــود..
التعديل الأخير تم بواسطة : مسعطر بتاريخ 25-07-2007 الساعة 12:01 AM.
|
24-07-2007, 11:54 PM
العرض العادي
المواضيع المتشابهه
