واقعنا....واللعب واضح في جميع المجالات ..

[ابو سالم المصراني]

السلام عليكم ورحمة الله وبركاته
اتمنا ان تنال هذه القصيدة اعجابكم
واقعنا / للشاعر : محمد جار الله السهلي


/الفكر/ ضد الموت في كل الأوقات ..
واللي بليا فكر عايش بـ تابوت ..

الصح منه يدوم ويخلد أموات ..
وإلا الغلط مجرد سنين ويموت ..

والشعر لو ماصار ساعي قناعات ..
يصبح حكي لكن على /هيئة بيوت/ ..

والصدق مفتاح الكرامه ومنجات ..
يكفيك من لبس السلام مشلح وكوت ..

والكذب نقص عقول وفعول واثبات ..
بـ ان أغلب الياقوت ماهو بـ ياقوت ..

والحب احلى شيء .. إلا مع الذات ..
والدار أغلى شيء .. إلا بلا قوت ..

و/الدين عزّ/ .. وهيمنه .. وانتصارات ..
لا صار قول . وفعل . وجهاد . وقنوت ..

يوم المشايخ .. قبل عصر الدويلات ..
تنقل كفن واسلاح .. /ماتنقل بشوت/ ..!

في وقتها يااهل الخطب والشعارات ..
سالت دموع العزّ من عين جالوت ..

وفي وقتنا .. يا صانعين القرارات ..
نضحي بـ غزة .. على شان بيروت ..

والفرق شاسع .. ياصراع الحضارات ..
والقول اكيد .. وبالأدلة .. ومثبوت ..

الماضي .. امجاد . وشموخ . وفتوحات ..
والحاضر مهايط . ومقهى . وبيلوت ..!

وأمر وأدهى .. ماهو .. /قادم وآت/ ..
لا صار واقعنا مبهذل .. وممقوت ..

يمثل /الأمة في الأمة .. عصابات ..!
وعلى خراب بيوت/ .! تتعمر بيوت ..

جلسات سرية على شان جلسات ..
تفوت اللي مستحيل انه يفوت ..!!

واللعب واضح في جميع المجالات ..
بـ تشوت ؟! صلح لي اصلح لك اتشوت .!

والخير بين فـي وجـيه البشارات ..
و/الشعب مستهلك/ ومتعب ومكبوت ..

حرية الرأي .. اختصاص القيادات ..
وحنا تخصص ذل /وانصات وسكوت/ ..

ياصاحبي .. خل القصص والحكايات ..
وش ميزة التوت .. إن فقد لذة التوت .؟!

إن مت ! من قول الحقايق .. سهالات ..
على الأقل تدري على ويش بـ تموت ..!

/والمشكله/ ماهيب في كثر الأصوات ..
المشكله لا صار ما /للعقل صـوت/ ..!

وســلامــتـكــم

[ابو سالم المصراني]

يا شباب شفو القصيدة هذه صدقوني تعجبكم

[king الوادي king]

الله الله

صح لسانك ولاهنت يا ابو سالم

ننتظر الجديد منك

[ابو سالم المصراني]

صح بدنك بس انت قريت القصيدة او الموضوع لان القصيدة
للشاعر محمد جار الله السهلي مو لي و ابشر بالجديد

[ناثرة الورد]

{{ أبو سالم المصراني }}
,
,
يعطيكـ الف عافيه علي هالاختيار المميز والقيم
آآبداع غير مستغرب منكـ
دمـت بهذا الرقي
تقديري ..,

[ابو سالم المصراني]

اشكرك يا ناثر الورد
على المروور الطيب و لاهنت