مع الهاجوس يا طـول المسـاري=وأنا قدني علـى ضيقتْـه ضـاري
أسج الرجـل وأدلـه وأتسيجـج=وأجر الصوت في بطـن الغـداري
وإلى منّه خوا الـراس .. أتريّـض=وأقرّب عزبتي .. وأشـب نـاري
وأزيّن لـي بهـا فنجـال ٍ أشقـر=علاج اللي غدا إمن العقل عـاري
وأنا اللي هاضني للبـدْع غـرو ٍ=إيماري بالحسن .. قدْم إنبهـاري
تذوب إلْـه المسامـع لا تحاكـا=كلامه ذرب .. وإسلوبه حضاري
ولو كل العـذارى حاوطـوا بـه=نجومٍ ... طمّهـا نـور القمـاري
أدل إمن القطا ... لدروب وصلي=ومن الهجران ... أذل إمن الحباري
ولو تاطا قدم رجليـه .. صحـرا=غدت في عيني إفيـاض وخبـاري
حداه الضيم .. وأنكف من عشيقه=يقول الهجْر .. ماهـو بإختيـاري
وقلت إلعينه اللـي صـب ماهـا=تداري .. من عواذيلش .. تداري
ما حن بأوّل من إيضيمـه زمانـه=على كل البشر تجـري الجـواري
ووادعني ... وذاك أتلا العهد بـه=وداع المزنـه إلجـرْد الصحـاري
لو إنه من رحل ماهـوب يطـري=جفاني الليل ... لإقبالـة نهـاري
فإلى منها إشرقت شمسي ذكرتـه=وأنا منْه أتناسـى كـل طـاري
يذكّرني بـه الصبـح إن تنفّـس=ويطريلي بعد .. وقت العصـاري
وأسج ولاخذيت إشويْ .. يقرب=غروب ٍ فيه من حزنـه مـواري
طرا ... وإليا بدت في الليل قمـرا=برت حـال الهـواويّ الطـواري
تخالج لـه معاليقـي ... وتركـي=على كبـدي مياسيـم إنتظـاري
ولانـي قايـل ٍ فـي بعـده إلا ّ=عساه إمجار من سحْم الضـواري
وأحاول قدر الإمكـان أتسيجـج=من إطيوف الغضي .. والليل ساري
