[راكان اليامي]

ما كل مـن يضحـك بدنيـاه مسـرور=لـو ضحكتـه دايـم تحـرك حجـاجـه
وما كل من يبكي مـن النـاس مقهـور=بعض الدموع رخاص من شـان حاجـه
وما كل صادق لو حكا لك مـن شعـور=يا كثر مـن زيـف المشاعـر خراجـه
وما كل ما يخفـا مـن السـر مستـور=بعض الوجيه ابين من ارهـف زجاجـه
وما كل بيت ٍ بابه انصك مهجـور=بيت ٍ بخل راعيه يطفـي سراجـه
وما كل ورد ٍ تزرعه ينثر عطـور=لو مـاه صافـي مـا يخالـط هماجـه
وما كل مرهف قلب لـو يـزرع زهـور=قلب يحب الـورد وهـو مثـل صاجـه
وما كل من يخطي من النـاس معـذور=البعض يخطـي مـن علـوم العواجـه
وما كل من يسكت على الضيـم مجبـور=لجل الغـلا ساكـت ويدعـي انفراجـه
وما كل راس ٍ ضيع الفكر مسحور=كم راس سحر الحـب جـاب ارتجاجـه
ومـا كـل علـه فادهـا طـب دكتـور=كم من عليل ٍ وصل خلـه علاجـه
وما كل من شاور حكيم ٍ خذا الشور=بعـض البشـر مـا يقنـع الا مزاجـه
وما كل من سمي صقر يشبـه صقـور=كم من صقـر وقـت الشدايـد دجاجـه
وما كل فزاع ٍ لجل مـدح مشكـور=البعـض مرجلتـه وسـامـه وتـاجـه