[شبيب ابن شبنان]

السلام عليكم ومساكم الله بالخير


هذي مرثيه في الشيخ فلاح ابن محمد ابن حثلين رحمه الله

الليل يسدل للعباد إستاره = وكلِ يفضفض له بكل اسراره
وأنا علومي كل ما افضفضها = تسدل على عين الحزين إستاره
يالليل وكبود الرجال معيفه = وقلوبنا جبارةِ صبّاره
الاّ بعض الاشياء تأثر فينا = والشاعر يـدوّه لـزين أشعاره
وأنا هجوسي كل ما جاء حلّه = احجله قيده وافك إهجاره
ويضرب بنات افكاري ويلقحهن = واشوف زينه في خشوم بكاره
والبارحه جوني ربوعِ واجد = ومن عرضهم هذّارةِ ثرثاره
قالو تبي تسمع علوم الوادي = قلت آهله والاّ علوم أمطاره
قالو هله قلت العلوم تنومس = ربوعي اللي في اللقا جبّاره
قالو فلاح وقلت وش فلاحه = قالو إبن حثلين قلت اخباره
قالو عطاك وقلت ابوي ويعطي = قالو عطاك وقلت هذا كاره
قالو عطاك وقلت معطي غيري = ماكنكم تدرون يالهذاره ؟!
قالو عطاك العمر قلت .. الدنيا = غدّارةِ بوّارةِ دواره
قالو سمعت العلم قلت أي بالله = اصبر يالين اجيك ياقبّـاره
ابغي اقبـّل ر اس من نفخربه = ستر البعيد وستر حرمة جاره
شيخِ قنص للمرجله واذهلها = والطيب طير وشخينا صقاره
فلاح مزبان الحريب الجالي = فلاح شيّد للمكارم داره
فلاح لامدّ الضعوف اغناها = فلاح غيثِ ماوقف مدراره
فلاح مدهال العلوم الزينه = فلاح تشعم في العدامه ناره
فلاح لاضاقت علينا بقعا = للعجمي اقرب من مصك إزراره
فلاح لاثقلت علينا الحمله = زومان في فعله وفي مقداره
فلاح لاكبرت علينا يقلط = والجمع تقلط به وجيه إخياره
لاجاه يامي في لزومِ بيـّن = يقوم له ماهيب قومة كاره
فقيد يام اللي فعوله بانت = تبكيه نجرانه قبل صرّاره
والموت حق وسنةِ ماطيـّـه = لو إنه رجالِ خذينا ثاره
ويجبر عزانا يوم خلف نايف = ماغير ابيه بطيبته وافكاره
والله يرحم شيخنا وايبيحه = ويكتب له الجنه بجنب ابراره
وانا هجوسي يوم جاني علمه = حجلته قياده وشلت اهجاره
واضرب بنات افكاري ولقحهن = والزين بيّن في وجيه ابكاره
هذا وصلى الله على محمد = ويرضى على صحابته وانصاره

[/QUOTE]





وسلامتكم...


شبيب ابن شبنان