قصيدة الشاعر عبدالله بن سعد اللوغاني يخاطب فيها
الشاعر سليمان بن ناصر بن شريم
طفل تعرض لي من البيض عيا ل = يخطي علي من لا يدوس الخطا له
يقول لي يا بن سعد صرت حيا ل = لا تخدع المسلم وتاخذ حلاله
لا تدعي بالطوع يا شين الأعمال = وتقول أنا دينت مالي وماله
تومي بمسباحك لاجل فيه ينقال = عاف الهوى ودروب غي الجهاله
حتيش لو حطيت طول من الشال = لك عمه وتصف بين الملاله
البيض ما أنته عن هواهن بمنحال = في حبهن تنقاد قود السهاله
قلت إي نعم بالعون ياطيب الفال = أنا مع الخفرات في كل حاله
في غيهن ذقت المصايب والأهوال = وجسمي نحل ما باقي إلا خياله
طرد الهوى لي صار هم وغربال = حمله ثقيل ومكلفن في مشاله
قلبي رهيف وزاده الحب ولوال = حب الغضي بالجوف قصره بناله
خشف سقاني الحب هيل ولا كال = هيل بلا مكيال والصاع شاله
حبه رسم بالقلب حرف من الدال = جرحه غميق ولا يفيد الدواله
خافي صوابي بالحشا كيف ينطال = عيا طبيبي يدعي في كماله
يا وين أبا أصبر والهوى سم قتال = لو حل في وادي تكسر جباله
يا وين أبا أصبر وأريش العين بجفال = شروى عنود الريم زايد إجفاله
واحسرتي ياهل الهوى كيف أبا أحتال= شاب الضمير وضاق واسع مجاله
على الذي لولاه ماصغت الأمثال = بالطرس له وابديت خافي الشكاله
مجمول مدلول بوسطه تعزال = ومدلمج الساقين زاهي جماله
لا شهد لا سكر ولا الريق معسال = الذ واحلى ما يوصف مثاله
الموق به من سحر هاروت عمال = لا واعذابي صوبتني إنباله
حور الصبا ياغرته تشعل أشعال = مثل القنر بالنصف توضي لياله
يشبه كما غصن له الريح ميال = مشي التغطرف مشيته بالعماله
راعي ثليل فوق الأمتان ينهال = مضمر والعنق عنق الغزاله
النور في خده زها حبه الخال = والعين تسحر بالصبى من دنا له
زم النهد بالصدر للثوب شيال = والحسن مله سهمته واستوى له
زها بحسن كل له أشكال = لوشافه العابد عن الدين حاله
يعاف دينه ويبتلى فيه بالحال = يمشي على راسه لزوم ايعناله
هذا الذي بهواه ماطعت عذال = والقلب ما يعتاض طفل بداله
يوم البخت وياه عدل وهو دال = اقطف زهر ماطاب وارشف زلاله
واليوم بان الصد عقب الإقبال = ما أدري عديل الروح شلي طراله
كدر حياتي واودع الهم بالحال = العمر ياسليمان قرب زواله
وش حيلتك يالقرم يا ماضي الأفعال = ابدي لك الشكوى من اللي جراله
بالرد كود الرد ينعش لي البال = ويريح قلبي من الشقا والعباله
واســلم ودم عــداد ما قايل قـــال = الله كريــم وجل ربي جلالـه
وصلوا عدد ما ينطق العبد بسوال = على نبي الحق والصحب وآله
رد الشاعر سليمان بن ناصر بن شريم
قال الذي يبدي غريبات الأمثال = من خاطر مستفزه بالسهاله
يصبر عاى الكايد بحال من الحال = وإن زاد حمله ما يضيمه مشاله
من غبته ما طالها بلد واحبال = غبت نمش فيها العنا والشكاله
من دشها يخطر بشبكات الأهوال = فيها لصبيان المعرفه نفاله
هذا بيان وما طرالي على البال = من قدم المعروف يطلب بداله
من واحد يشكي يقول الدهر مال = وازرا يميز ميلته من عداله
سود الليالي كلها غمس واحيال = من غير زوج عشره بالجهاله
يا بن سعد كل الدهر شمس وضلال = لولا انتهات الضل ما جا زواله
تشكي غزال قلبك وهو زا ل = هو زل بالحاله وقلبك الحاله
وتقول صابك عقب فرقاه سلال = والموت ما نقدر ندور الدوا له
عقب الذكا تشكي لنا رقت الحال = جسمك نحل ما باقي إلا خياله
هذي سوات الحب مع طول الأمهال = ينبيك عن راعيه جسمه وحاله
والبيض خوانات والحب قتال = ماينبذل بهن الثنا والجماله
من عصر نوح وعاد الأول إلى التال = ازكاهن اللي من حكاياه حاله
والوقت غير له محل ومنزال = وافترت ايامه بجدت لياله
واللي بقا من صفوته تول وحثال = وش خانه اللي ما بقى إلا حثاله
لاصار ماتشرب قراهيد وازلال = لا تشرب الخابط الى أقفى ازلاله
بدلت حرف لك من الدال بالذال = عندك تصاريفه وعندي إكماله
نصيحة ما نيب أدور بها مال = أيضا ولا فيها لمثلك ختاله
إترك هوى من لا يجي منه مرسال = الى منه أقفى منك خله ابفاله
تراه ما ينفعك من كل الأحوال = الى إهتوى درب لغيرك مشى له
لو هو حلف بآيات عما والأنفال = وكاد كذبه ما يفارق اضلاله
مير إتركه وإترك خبيثين الأعمال = واجزم وشم وإترك ادروب الرذاله
وإجنف عن اللي بيعه المن بريال = تراه يفسد عملته من هباله
رضاع مهل ماتت أمه وهو عال= وذاق الرضاع بكل ديد صفاله
يابن سعد ما ذكر من وادي سال = إلا رعاه اللي يصلح حلاله
ترى الخوي اللي الى شلت ما شال = كنك بعيد عنه وانته اقباله
ذا قول من لا سيل قبلك ولا سال= في وقت مثل اليوم دور مضى له
يبخص طواريق الهوى دق واجل = يكفيه عن ما فيه حضرت مجاله
ما بين نقاض وما بين فتال = يطرد نصيبه يوم دار الهوى له
يقبل مع المقبل ولا هوب ملال = ولا ذكر عشب بعيد وعنى له
واليوم شاف وعاف وانكف وهو ذال = ماله بمرباع تعيب اخياله
قلته وأنا من دولة الوقت مهتال = جوار غيضه ما يقابل دلاله
واسلم سلمت ودمتيا ماضي الأفعال = وكمالته عن رد مثله حماله
مانيب لا تاجر ولا نيب دلال = مسكين همه في معوشه عياله
وصلاة ربي عد ماهل همال = على نبي فضله بالرساله
منقوووووول....