جاها النصيب وعلمونـي بالاخبـار
ولاعاد عندي غيـر ازف التهانـي
قولولها تنسـى المحبـه وتختـار
زمـان غيـري لاتـدور زمـانـي
سمتني الطرقي على شان الاسفـار
اجي لها من شاطي الشـرق عانـي
في حبها ذقـت النكايـر والامـرار
واللي وطا مجنـون ليلـى وطانـي
كم مرة ٍ لعيونهـا دسـت الاخطـار
وارخصت عمري يوم ربي وقانـي
ماطعت من هو شار في خير الاشوار
اللي عـن دروب المـوده نهانـي
الموووت قدامي على سكـة النـار
والنفس .. ماترضى طريق الهواني
لا شـك تدبيـر الليالـي والاقـدار
راااحت وانا سلم القبايـل حدانـي
عندي خبرها تتـرك الـدار لديـار
وانـا مكانـي ماتغـيـر مكـانـي
اما الزمان اللي تعشمت بـه جـار
والا ان حظي عن هـواي احتدانـي
والله ماكنـت اتكـلـم بـالاسـرار
لولا القهر غطا سمـاي وغشانـي
علي اصد ويكفي النفـس ماصـار
يكفي علي من الظـروف امتحانـي
ادعي لها الله دايما ً سـر وجهـار
تلقى سعادتها مـع انسـان ثانـي
اليوم ابحرق لاجلهـا كـل تذكـار
كـل الرسايـل والعطـر والاغانـي
واحرق بطاقة عرسها ضمن الاشعار
وارضى بمـا قـدر عليّـه وجانـي
واقول.. ياقلب العنا خـل الافكـار
وانسى السنين اللي تعدت ..عشاني !!
