ماقلت لك يوم انك اخطيت .. غلطان ! = مسامحك / حتى مابي لك معاذير
لكنّي اعاتبك .. يوم انك انسان = انسان غير .. وفي عيوني بعد غير
حاولت ابرّر ماحصل لي .. والى الآن = عجزت لا احصّل لما صار تبرير
لكّن تبقى للتعابير الالوان = اللي تعوضني هاذيك المخاسير
الفرق ! مابين الحبايب والاخوان = مدري! .. ولكن شي ما أظنه يصير
ما اصعب من الصدمه ودورات الازمان = الا اني القى للحقايق تفاسير
عندك عصى موسى وخاتم سليمان = وعندي خطاك اخّف من ريشة الطير
اصد عنك .. وكل هذا علشان = ان الصدود احيان حشمه وتقدير
لا تأخذ بخاطرك .. مانيب زعلان = مشكور ومجمّل .. وتصبح على خير