[ابومحمد الشامري]

تكفون يا اهل الملعبة تكفون=بالملعبة ودي ولا ودي
يا بو حمد لا تفرط الطبلون= وإن جيت في درب الخطر هدي

مادامكم يا ربعنا تقوون= شدو صفوف الملعبة شدي
يا ابن حسن للملعبة قانون= خلك معي لا تنقلب ضدي

ما تفرق الصاحي من المجنون=والسامري ما يشبه الردي
كان انت رجال معي مأمون=هالحين ابعلمك بالسدي

عطني مثل عمرك وأقول اتمون=وأشره علي لا جيت متردي
حنا ترانا نرغب العربون= والبيع دايم مد باليدي

أطلب من اللي كونك بالكون= يا اللي تجيب العلم وتودي
يا بو حمد من فعلكم ممنون= لبستني ثوب على قدي

مادام ما عندك جديد فنون= نشبعك يا اللي منت متغذي
لقيتها عميا وبه طاعون= الله يرحم جدك وجدي

ترى الزبد من رغوة الصابون= هالحين اغسل منها يدي
وش قال ابن جابر وابن لعبون= اقليله ماهيب تنمدي

اللي هدر يعبا له الحاجون= والسيف للي صار مرتدي
لا صرت ضايع والعرب يمشون= انشد وتعطيك العرب ردي

ابو حمد الشامري