يالله طلبتك وانت تعلم بحالي
يا ربنا المعبود منجي دخيله
تفرج همه لمن بوزن الجبالي
لا جيت اعدل ميل جت لي مليله
تقبل وتقفي بالحشى باجتوالي
يالله طلبتك همي إنك تزيله
فكرت انا بالحل من كل حالي
وازريت انا بالحل هذا نحيله
واليوم بالظفران جاهٍ ومالي
في لازمي والحمل من يرتكيله
يا بونغيمش يازبون الهزالي
وقفت أنا بالحمل وأبغى تشيله
لن عادتك شل الحمول الثقالي
ياليتهم حطوك شيخ القبيلة
فعلك ظهر غرب وجنوب وشمالي
يوم الردي محتال كسب النفيله
مالك وصيفٍ كون زيد الهلالي
انشهد إنك وافيٍ من قبيلة
ربعك هل العادات المقالي
حرابها تسقيه كاس المليله
عجمان لا ما قيل ياهل الجمالي
ياقف لها وقفة دخيل لدخيله
وعمك فهد والجد جدٍ مثالي
وابوك من قبلك بدأ فالطويلة
وانته على ما قيل ياهمالالي
الراس يابس والمعادن اصيلة
ويشهد على ماقول واثبت المقالي
بيتٍ به الضيفان في كل ليلة
ودلال رسلانٍ ونجر يلالي
والعود الازرق نوة مستخيله
هذا وانا اعدك رفيقٍ موالي
اخوٍ من العجمان مابغى بديله
الشاعر / عايض بن حسن الحريشه