وش سالفة ذكريات الطفوله هالأيام .. انا لي اسبوع ماغير تطري على بالي ذكريات حرب الخليج لاني بصراحه ما اذكر شي بحياتي اصغر من ذاك السن وكان عمري وقتها 6 سنين وقبل فتره تمر فبالي اشياء واجلس افكر فيها .. ووقتها يمكن قبل اسبوع نتسائل انا و واحد من الربع .. اقوله تذكر حرب الخليج يقول ايه اقوله تذكر يوم كانوا يسكرون الدرايش ويغطونها بلصاق واكياس ثقيلة .. يقولي ايه كانت امي شاطبة على كل الدرايش .. اقوله طيب ليش .. يقول مدري .. وجلسنا نتسائل ونفكر لين ضاع الموضوع عاد بكرى ان تذكرت بسأل امي عاد ابوتس يالطفولة ... راحت وانا كل يوم راسي مفلوق ولافين عليه شاش مره قامز فوق شبك العشه بمزرعة جدي وطحت من السماء على الدجاج وبين الحمام ومره ناجفني التيس بقرونه ومره قامز فوق اكياس الشعير وطاب ابمسك سلسلة المذبح حق الاضاحي .. ولعلي سيدت على خشتي للأرض ومره بعرس تضاربنا وحنا بزران مع بزران ثانين بس كانوا اكبر منا وآكلتها بفلقة محترمة من حصاة محترمة قسمت راسي المحترم نصين الوكاد انها طفولة الفلس خصوصاً لاتذكرت المعاناة مع جلد مدير المدرسة وتبقيص المدرسين خخخخخخخخخخ >>> على طاريه مدير الابتدائي قبل فترة شفته بعرس وعجزت احب راسه يالله تحملت اصافحه وبعدها جاني تأنيب ضميييييييير عجيب عشاني ماطبعت على راسه قبلة احترام .. بس قابلت واحد قلت بالله تذكره ايام الابتدائي قال الله لايذكره بخير .. وتفاجأت ان كل شباب جيلي الي معي بالمدرسة شايلين بقلوبهم للحين لانه كان متفرغ للجلد .. ويوم شفت العالم كلها عقب كل هالسنين ماتطيق شوفته .. جاني تأنيب ضمير ثاني لاني سلمت عليه و صافحته خخخخخخخخخخ
التوقيع
يا عين نامي وخلي للزمن همي خليني أرتاح وأسلى باقي أيامي متى على الله شتات العمر يلتمي اتعبت في درب جرحي ذابل أقدامي ناديت صبح الفرح .. لكن ماهو يمي يا ليل الأحزاان .. كيف أحقق أحلامي كم سال موقي وبلل .. بالعنا كمي مع كل هذا صبور .. وموقفي سامي سليمــان الغفيلي