[نيَـة فراق ..!]

مدخل :

ان غاب صوته يبقى ما فات ، مامات ! = حنّا كذا ، والا كذا ما انتهينا !
حنّا قطعنا لـ / التلاقي ، مسافات = ونغنّي دايم بـ / الهوى [ ما علينا ] !
حتى النهايه في هوانا بدايات ! = كل ما وصلنا قمّه ، عدنا ابتدينا !
يكفي تصدّرنا جميع العلاقات ! = ويكفي نبت ورد المحبّه بـ / يدينا :)

نص [ قديم ، جديد ] ،

اتمنى ينال الاستسحان ،

حتى لو انّا قطعنا الصوت بـ / نعاني ! = الذكريات القديمه [ باقيه ] معنا !
وحتى لو انّا افترقنا كيف ينساني ؟ = وشلون ابنساه وكلِ شي يجمعنا ؟!
كل الاماكن تردّد اجمل اغاني = كنّا نتسابق ونهديها لـ / مسامعنا !
ليه نتباعد مادام الكون ذا فاني ؟ = ليه عن دروب الوصل نعلن تراجعنا ؟
يعني وش اللي بعد للحين ما جاني ؟ = وحظٍ جمعنا بالامس اليوم يقمعنا
ما همّني لو ظروف الوقت تعصاني = وما همّني لو عيون الكون تتبعنا
عندي الاهم شوفتك يا بعد من جاني = لبّيه يا ضحكنا ، ولبّا [ مواجعنا ] !
اشواقي ، وعيونك فـ / كل ليل تنخاني = تقول : شوفي النوى وشلون يوجعنا !
وانا لو ان الظروف تخاوي جناني ؟ = لا اخلّي الوصل ياكلنا ، ويشبعنا !
اقرب حبيبي ولا تهتم لاحزاني = خل الورود اتغنّى في مرابعنا
انا وقلبي وعيني نجر الالحاني = وبصوت واحد [ نحبّك ] وانت سامعنا !
حبّك بعيني طفل لاجي لاحضاني = كبّرته ، واصبح عن الزلات يردعنا !
اشتاقلك وادعي الله دوم يبلاني = في زايد الشوق لو ينثر مدامعنا !
واقول : أحبّك بقلبي ، ويزعل لساني ! = شف كيف حبّك مجنّنا ، وممتعنا :)
ساعة لقا لو تباع بغالي الاثماني ؟ = ندفع ، ولو تشترى بـ / مليون ؟ ما بعنا !
ما نقّص الحب لا شانك ، ولا شاني = حنّا هوانا [ يقدّرنا ، ويرفعنا ]
حنّا ملينا الفضا ضحكات ، واماني = وحنّا قهرنا كثير اشياء تفزعنا !
على كثر ما هويتك ، وانت تهواني ؟ = على كثر ما قدرنا الشين روّعنا !
وعلى كثر ما نجامل وقتنا الجاني ؟ = على كثر ما يبي الفرقا ولا [ طعنا ] !
والواقع اللّي تحدّيت ، وتحداني ؟ = اخترت منّه ملامح تحكي واقعنا :
الحب لولا معاناته والاشجاني ؟ = ما كان صار اللقا [ ابرز مطامعنا ] !
والحب ما ينتهي وحتى لو انهاني ؟ = عزاي ما شفت دمعك في موادعنا !

وسلامتكم

مخرج :

اليا زعلنا نتّفق بعد لحظات = نرجع ، ونشعل شمعنا اللي طفينا !
هذا هوانا اللي تمنّينا بـ / سكات = عيوننا قالت ولو [ ما حكينا ] !
عشنا حكايه غير كل الحكايات = صارت مثل روحٍ تعيش بـ / كلينا !
ما والله نلحق هـ / المحبّه حسافات = لو من هموم البعد [ ياما شكينا ] !