[عبداللطيف الفضلي]

ألا ياحَـرْفِي الصـارم خبـرتك دايمٍ بـتــار = بـغيتك تـبتر المـفـسـد شهرتـك بالعماليّـه

تقوّى واشرب الفنجال ياصنديد يامغـوار = وشرّف من على طودٍ يسر النفـس عاليّه

تجمّل وانصف الإنسان في منظومة الأشعار= وفي صفـحــاتـك البـيـضا تـنـزّه بالمـقاليـّه

يصيـح الكـون من ظلم البـشر يارب ياستار = ويفرح من صنوف الحب يعطي له جماليّه

يصيح الشعب مايقوى على وحشيّة الأسعار= بـغــابــة كـلّــها غــيــلان تــبــغى للقتــاليّـه

فواتـيـر ومعيــشـه يـنـتهي كنــّه رماد النـار = يـضيــع الراتـب المـحدود مافيـه احتـماليّـه

ألا ياحـرف بيّن من يبوق المال والسـمـسار = وبـيّـن مـن تـلاعب ماجـعـل للنـاس مـاليّـه

بديـره كـلــها خيــرٍ حــكـمها وافي الأشـبـار = رحـيــمٍ طيّــب الأفــعـال واليـمنى شـماليّه

ســكـن بـقـلوب شـعبـه ياهنـاهم حبّـهم جبّار = تـزايــد حـبـهم بالقـلـب سـوّى لـه فـعالـيّــه

عدا بعض العرب بقلوبهم ماتضوي الأنوار = يـحبـون الحـسـد دايـم وتـسـكنـهم جـهـاليّـه

يـقـولون الشعـب في خيرذااللي كنهم منشار = يـعيـشـون العتـامه بـوم مايـهوى المـثاليّــه

حـروفٍ ماتـفيد النـاس للشعّار صارت عار = تـجيب الكذب في صورة وترسمها خياليّـه

ألا ياحرف خل الصـدق منطادٍ يجوب الدار = ويتـجمـّل بصيـغة تـزدهي معـها الكـماليّـه

أنا ماودّي تجنح عن صواب القول بالأفكار = توسّـط لاتـغالي غـيـث منعـش في هـماليـّه