[سعود الخويطري]

هذي قصيدة لـ ذيب بن راشد بن الذيب ( شاعر الاربعين ) قالها

وهو جاي من السودان ومارين مكة المكرمه فقاولوا ربعه اللي معه

هذي وادي فاطمة ياذيب... فقالهم وادي فاطمة حنا جيناه على سيارت

وجدانا جووه على جيش وسجلوا به تاريخ وعلى راسهم الدامر فقال

هذة القصيدة :

عد ماهبت من النكة هبايب = ياسلامي عد ماهبت هبوبه
جيت قاعٍ قد وطوها بالنجايب = ربعي اللي كل عدٍ شرعوا به
مع صبي لاسرى ماهوب هايب = قبلي العراف قروا واقتدوا به
صافيٍ ذهنه بعيد من الشوايب = قومه اللي عند راسه نجموا به
ربعي اللي تاخذ العليا غصايب = كم وكم ذودٍ من المظما سروا به
ربعي العجمان مقباس الحرايب = كم عقيدٍ من ذلوله حولوا به
لانتخوا باسمي حسينيات الذوايب = من وقع بنحورهم ماقام نوبه
بايعين العمر في سوق الجلايب = لابتي سوٍ على المخطي اعقوبه
تابعينٍ شف حلوات الحلايب = ابلهم من باسهم دوم مهيوبه
فعلهم في ماضي الدنيا عجايب = بالسجلات اكتبوه ودرسوا به
ومن يغط افعالهم ظالم وخايب = غط نوره للفخر ظلمٍ وحوبه
ويوم زانت من فصل جزل الوهايب = ساهموا في نهضة ابلاد العروبه
الجهل ولاّ وردينا حبايب = وللمعالي كل منا لبس ثوبه
قلتها عن لابتي غمرٍ وشايب = واحمدالله هرجتي دوم محسوبه
المهم انّا عطيبين الضرايب = ومن زعل من مدح ربعي مادروا به