[عويضه الوقدان]

نسيان الماضي والعيش في الحاضر

أثقل المعنى على بيض الأوراق=وتنزف من أعماق المشاعر قصيده
ينطق شعور القلب لا لاح براق=وأختار من شرد الفرايد فريده
انا على شوفتك يا بنت مشتاق=والشوق يجري في مجاري وريده
الله لايجزى نهارن به أفراق=الموت واحد والوسايل عديده
كنتي صباح الخير في وقت الأشراق=وكنتي الأماني والحياه السعيده
حسبي عليك الكون في خاطري ضاق=مدري على فعلتك وش مستفيده؟
كم قلت لك والوضع ماعاد ينطاق=وأثر المفارق صدق وأنته تريده
اليوم مات العشق مافيه عشاق=يعني حياتي بأعتبرها جديده