ألا يا بنت يا أُم الثغر الأحمر والعيون السـود=ألا يـا دمّ قلبـي يـا مكاسبـه ومخاسـيـره
على مرسال عينك جيت تحداني هبوب النـود=سحابة شوق يشحذها الصبا بأزكى مزاميـره
مقادمها تلوح بروق وأوسطها يحـنّ رعـود=لـعين المستغيـث وعيـن تهليلـه وتكبيـره
أنا لى جاء لي اللي ما بـقلبه للكرم موصود=أجـي لـه حاتمـيًّ مدّتـه تفنـي مذاخيـره
كريم أطباع وأضاعف لراعى الجود ردّ الجود=وأبادل بالوفا راعى الوفا والسرّ مـا أعيـره
ولي قلبٍ خصوبة تربته مـا مثلهـا موجـود=إلى أمطره المطر ودّك تفرّج فـي نواويـره
وش أبقول مدري لكن أنا أنقاد وأنـت تقـود=وقف ضيفك على بابك تـولّ أمـره وتدبيـره
بلى رسمية أول يوم يعني تعـرف المقصـود=ولا تغتالك أشباح الخجل وتصير فـي حيـره
تهادينا القلوب وللخجل يحتاج كسـر حـدود=وحنّـا والهـوا علـى بركـة الله وتيسيـره
قران الحبّ يجمعنا علـى سجّـاده الممـدود=تحت سقف الهوا وأنتي وأنا حنّـا عصافيـره
هذا ما كان ينقصنا وهـذا اللـي لنـا مفقـود=لقينـاه ولقانـا يـا بختكـم يــا مـداويـره
دخلنا الآن في فصل الربيع وقطفـة العنقـود=يا من ولّت مجاهيمه يا مـن هلّـت مغاتيـره
ما بين مروج ونجومً تغازلها فـالأرض ورود=تقهوينا الغـزل والجـوّ روّق تحـت تأثيـره
سوالف سالب وموجب ولعبة طارد ومطرود=وتعريجة على بسط ومقـام وغيـره وغيـره
وطاب لنا السمر تحت القمر والليل هود وهود=بعيداً عن خطر غيب الزمان وعـن محاذيـره
بلغنا الغاية اللي ما بعدهـا مطلـبً منشـود=وراسلنا الفظا بـهجيني الشعـر ومجاريـره