[عبدالعزيز الحربي]

كل ماعاينت بشرى تذكّرت البتول === ثمّ قمت أحثّ روحي على الصبر الجميل
الأسى تمحاه الايام والذكرى تطول === والغلا لو أقلب الارض مالقاله مثيل
ماصدمني مثل ثنتين ياصحاب العقول === أول المآساه صدمه وتاليها رحيل
مار ياقلبي تسلاّ وللصعبه حلول === وانت يامتني تصبّر على الحمل الثقيل
من سلك درب الهدايه عرف كيف الوصول === والحياه الفانيه صبحها قافيه ليل
الدليل أوضح من الشمس يالعبد الجهول === وانت يامسكين لازلت تبحث عن دليل
كان قصدك فقد غاليك أذكّرك الرسول === واحد" ماله مع الحي والميّت مثيل
مايدوم ألاّ الله الدايم وغيره يزول === ثمّ يوم البعث كل" يبا يلقا الحصيل
أقتنع كانك من اللي لياحزّن يقول === قدّر المولى والاقدار ماعنها سبيل
واكتم آلام المصيبه وخذها بالقبول === وابشر بجنّه بها عين تدعى سلسبيل
صدّ عن دنيا الشقا والمطامع والغلول === خلّها للي يخون الامانه والبخيل
والله اني لو نسيت البشر مانسى البتول === لين أحسّ بسكرة الموت في يوم الرحيل