البنـادم دايـمٍ امـرة عجـيـب=واعتراف الشخص من واقع حزن
كل مايخطي يحسب انه مصيـب=ولا وقع في سوء زلاتـه فطـن
يحسب انه في بعض الاشياء ذيب=مايعرف ان كل شـي لـه ثمـن
الله اكبر يـوم جيتـك يالطبيـب=زاريٍ عقلي وانا صاحـي بـدن
هقوتي وان كان ظني مايخيـب=من خواطر تيه مدري من شجـن
علتي فالجـوف واقدهـا لهيـب=والغلا نسناس وضلوعي غصـن
والموادع حلم والفرقـا نصيـب=والشوارع تيه والظلمـا سجـن
والصدى للصوت لانادى يجيـب=والبيوت قبـور والوحـدة كفـن
والحزن فانوس والهاجس صحيب=والوصل مجداف وأمالـي سفـن
عايشٍ في دنيتي عيشـة غريـب=لافراش ولا متـاع ولا وطـن
ذي عيوني تطلع الشمس وتغيـب=تسرق الغفوات من عين الزمـن
والشجاع اللي بقى جرحه عطيب=مايعرف الغدر يوم انـه ومـن
وان تدارك غلطته وابقى صويب=زاد غبنه مـن معادينـه غبـن
وان تفقد مهرتـه عنـد المغيـب=سابقات الارياح مافيهـا رسـن
امتلابي الحزن فالصدر الرحيب=واشهد انه فـي مداهيلـه زبـن
كان جرحي طاب والا لايطيـب=بغتنـم ثلثيـن عمـري مابقـن
لو بقالي يـوم ماقبـل المشيـب=لأشتري سعادتي بأغـلا ثمـن!!
لـــ/ منصور بن جعشه