[منتهى الذوق]

بسم الله الرحمن الرحيم خليف المقرود والشيخ ساجر الرفدي من طرائف القصص والعلوم اللي صارت لساجر الرفدي مع رجل اسمه خليف والسالفه ، أن خليف رجال مشؤوم وماهو موفق وكرهوه جماعته وشد عنهم هو وامه وجاوروا الشيخ ساجر الرفدي وكان شهر رمضان هاك الوقت ، الوكاد وطلعوا للمقناص والشيخ ساجر عنده طير اسمه ((حطاب)) وكلب سلوقي تكرمون اسمه ((خطاف)) ويوم انه راعى الشيخ لها الارنب وهو يهد الطير عليه ويحده يمين شمال وياكود خليف يقمز ويزهب بندقه وهو يرمي الارنب الا هو مصوب الطير وغدى ميت ، ويسكت ساجر شوي ويكتم زعله ، الوكاد ويراعيله ارنب ثاني ويهد السلوقي عليه وهو بعد يحده والا خليف يرمي هالارنب الا هو مصوب السلوقي واذبحه وزعل الشيخ ساجر وخلى المقناص ورجع عن المقناص كله علشانه حاس مزاجه ، ويم رجع خليف لامه سولف عليها باللي صار له مع الشيخ ساجر وتشور امه عليه وقالت له ياوليدي ياخليف رح وحب راس الشيخ ساجر وتعذر منه ، الوكاد وينصى خليف الشيخ ساجر ويم جاه لقاه شاب ناره ومقلطن دلاله ومزهبن السبيل العظم اللي يمزون به التتن ، وكان الشيخ ساجر متحرين الفطور لانه بشهر رمضان ، وقاله خليف أنه ماكان بنيته يصير هالشيء وانه يبي يعتذر وسامحه ساجر يوم جاء يبي يحب راس ساجر والا هو ياطا على العظم (السبيل) ويكسره وعفره بالتراب وزودن عليها ينشب البشت بالدلال ويقلبها على النار000 يعني كملت اربع بيوم ياملا القرد اعوذ بالله0 وعقبها ساجر انجن والشيخ ساجر شيخ وولد حموله وماتطلع الكلمة الشينه منه ، الوكاد قال لخليف ياخليف خذ ماتبي من البل وشد عني تراه ازين لي وازين لك وضاع على الشيخ ساجر حطاب وخطاف والسبيل ودلاله وعقب ماشد خليف من يمه وهو يقصد الشيخ ساجرالرفدي قصيدته : البارحـة يــا خلـيـف عــزي لحـالـي.....مضيت أنا ليلـي حزينـن ومحتـار أمـرن جـرى ماعمـر مثـلـه جـرالـي.....يا تقل توقـد بالضمايـر لهـب نـار تعوكـسـت ياخلـيـف بــاول وتـالـي.....من خلقت البدوان ما مثلها صار مـن خلقتـي مــا شفتـهـا بالليـالـي.....اربـع مصايـب لوعنـي مـن الـجـار الاولـــه حـطــاب يــســوى عـيـالــي.....اشقر عديمن لابرق الريـش نثـار والثـانـيـه خــطــاف مــالــه مـثـالــي.....شره على تيس الجميلـة الـى نـار والـثـالـثـه نــثــرت غــوالــي دلالــــي.....وقصرتها وفاحت علي بن وبهـار والرابـعـة بالعـظـم تـتــن الشـمـالـي.....وافلست منهن عند حزات الافطار لو كان جتني قـوم وافنـت حلالـي.....اصبـر علـى مـر الليالـي والاعـزار هـــــذا وأنــــــا مــهــزابــة لـلـرجــالــي.....وياما كسبت من العدا جل وابكار والـعـمــر يـفــنــا وآخـــــره لـلــزوالــي.....والحظ يلقى عند حصـات الاوبـار