الشاعر المبدع : ماضي ابن مبارك ابن عضيمان آل ضاعن العجمي.
سلام يا عجمان يا سلطنة يام=يا عز يا نوماس يا أعظم قبيلة
يا مارثة مذكر و يا ترثة هشام=يا أهل السيوف المرهفات الصقيلة
يا نوم عيني شوفكم طول الأيام=الذكر طيب و المواقف جميلة
أمجادكم ما هي سواليف و أحلام=يحكيكم التاريخ ما ينحكي له
للصلب قبلة للحسا لين الأوجام=لكاضمة و دروبكم مستحيلة(1)
مضارب(ن) تشهد لها ماض الأعوام=عدوكم ما داج فيها بخيله
الأبل غدا للرمح في نحورها أعدام=و كم راس شيخ(ن) تحت حافر الأصيلة
شرسين عسرين و كريمين و حشام=و يا مكثر كبود(ن) عليكم غليله
كبيركم تركع لهيبته الأصنام=كنه طويق و له مهابه جليله
و أوسطكم لربعه كما درع و حزام=من طيب ذكره يجذبك ريح هيله
و صغيركم في المرجلة شق له خام=قلاعته طرفه و قلبه دليله
عجمان و العجمان سبع(ن) و ضرغام=و فهود و عوال الظفر و الكحيلة
و باقي القبايل بالفخر تحمل وسام=و أصل الحصان حصان ما ينحكي له
و اليوم صرنا بأمن و أرزاق و أنعام=و كلن يبي بيت و يبي له حليله
و يبغي وظيفة و يحسب للشهر تام=و يشوف له موتر جديد(ن) موديله
الدار محكومه على شرع الإسلام=و الرب واحد كلنا نحني له
و كل القبايل صارت بحكم حكام=و حنا مع الحكام يمنى(ن) طويله
محبه و عهد(ن) لشيبانا دام=نعم ولا زلنا بأمانه نشيله
و في زحمة العلم و متاهات الأقلام=و المخ يغسل بين يوم و ليله
شفنا ما شفتوا مثل تصوير الأفلام=و أثره حقيقه من عدو و عميله
شنوا علينا حربهم بعض الأزلام=و أهل الكفر شبوا براس الفتيلة
و أهل الفتن صالوا و جالوا في الإعلام=صرنا نواجه صدق حملة ثقيلة
شبابنا غرر به و قيد بخطام=و حطوه عمله يوم نفسه ذليلة
و إليا أنحرف لو إن له أخوال و أعمام=إن ما قطع راسه نقطع رجيله
يا شرذمه عدونا عقبكم قام=ولا كسبتوا غير عار و فشيلة
كان الوعد قدام بنروح قدام=و نبيع الأنفس في حياض الفضيلة
حنا خلقنا الله على روس الأعلام=و الصف الأول ما رضينا بديله
و من دون حكام البلد خنجر سام=في صدر من يمشي دروب الرذيلة
و دون البلد فولاذ مظروب بلحام=اليد وحدة و الدوافع نبيلة
1-كاظمة : أسم محافظة الجهراء قديماً.