[صالح الغباري]

جاتك مراسيلي على خط مكتوب=مكتوب من دون أزرق الحبر يِقرا
ساعي بريده صفحة الشعر مندوب=فيه أعذب القيفان شعرٍ ونثرا
فيه الكلام أحلى من السكر يذوب=في وسط برّادٍ غلا فوق جمرا
معه أختلط شاهي بوزنه ومصبوب=صبّت كريم ما نوى فيه غدرا
رتبتها بأطيب عبارات وأسلوب=يِذهب صواب القلب منّه ويبرا
وردت ذودي ورث ما هو بمسلوب=على حياضٍ للمعازيب تطرا
في ثجةٍ ترعى بها كل خرعوب=ماها وفير و خدّها دوم خضرا
لا ماتورد سوق جالب و مجلوب=ولا عرّضت للسوم ولا هي بتشرا
سقفٍ تماري بالدلع كل عذروب=مصيونةٍ ما بين حمرا و صفرا
عندي غلاها يا ذهب سِك مسكوب=زايد على مال جمع فيه كسرا
ونا إحمد الله سكتي كلها دروب=سهل و جبل مسراح ولاّ بمسرا
مامشي طريقٍ قالت الناس مذروب=وش لي طريقٍ فيه بيضا و سمرا
للصدق ثوب ولبس غيره مية ثوب=تبلى ويبقى الصدق ثوبٍ و سترا